തിരുവനന്തപുരം: രാജ്യത്ത് ഏറ്റവുമധികം സ്വകാര്യവൽക്കരണം നടപ്പിലായിട്ടുള്ള വിദ്യാഭ്യാസ മേഖല കേരളത്തിലേതാണെന്ന് ഉന്നത വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി ഡോ. ബി. അശോക് വ്യക്തമാക്കി. കേരളകൗമുദിയുടെ നേതൃത്വത്തിൽ നടന്ന ഉന്നത വിദ്യാഭ്യാസ ഉച്ചകോടിയിൽ സംസാരിക്കവെയായിരുന്നു അദ്ദേഹത്തിന്റെ പരാമർശം. ആകെയുള്ള 11,000 കോളേജ് അദ്ധ്യാപകരിൽ 8,000 പേരും ജോലി ചെയ്യുന്നത് സ്വകാര്യ സ്ഥാപനങ്ങളിലാണ്. ഇവരുടെ ശമ്പളത്തിനായി മാത്രം സർക്കാർ ട്രഷറിയിൽ നിന്ന് പ്രതിമാസം ആയിരം കോടി രൂപയിലധികം ചെലവഴിക്കുന്നുണ്ട്. അദ്ധ്യാപകരെ നിയമിക്കുന്നത് മാനേജ്‌മെന്റുകളാണെങ്കിലും ശമ്പളം നൽകുന്നത് സർക്കാരാണ്. ഇത്തരത്തിൽ പൂർണ്ണമായും സ്വകാര്യവൽക്കരിക്കപ്പെട്ട മറ്റൊരു മേഖല കണ്ടെത്താനാവില്ല. എന്നിട്ടും, നമ്മുടെ നാട്ടിൽ ഇപ്പോഴും സ്വകാര്യ വിദ്യാഭ്യാസത്തെ അതിസൂക്ഷ്മതയോടെ മാത്രമേ സമീപിക്കാവൂ എന്ന വാദമാണ് നിലവിലുള്ളത്. പതിനാല് വർഷം സേവനം പൂർത്തിയാക്കിയ ഒരു കോളേജ് അദ്ധ്യാപകന് ലഭിക്കുന്നത്, പതിനാറു വർഷത്തെ സർവീസുള്ള ഐ.എ.എസ് ഉദ്യോഗസ്ഥന്റെ ശമ്പളത്തിന് തുല്യമായ തുകയാണ്. മുൻ സർക്കാരിന്റെ ഭരണകാലത്ത് സ്വകാര്യ സർവ്വകലാശാലകൾ ആരംഭിക്കുന്നതിനുള്ള നടപടിക്രമങ്ങൾ നടന്നിരുന്നു. മലബാർ കേന്ദ്രമാക്കി സർവ്വകലാശാല സ്ഥാപിക്കാൻ ഒരു പ്രദേശത്തെ വ്യവസായി പദ്ധതിയിട്ടിരുന്നു. ഈ വിഷയം തന്റെ മുന്നിൽ അവതരിപ്പിച്ചപ്പോൾ, നിലവിലെ സർക്കാർ നയം ഇതിന് അനുകൂലമല്ലെന്നാണ് താൻ മറുപടി നൽകിയത്. എന്നാൽ, നയങ്ങൾ നമുക്ക് രൂപീകരിച്ചുകൂടേ എന്നായിരുന്നു അദ്ദേഹത്തിന്റെ തിരിച്ചുള്ള ചോദ്യം. ആ സംഭവം നടന്ന് രണ്ട് വർഷം കഴിഞ്ഞപ്പോൾ തന്നെ നിയമസഭയിൽ ഇതുമായി ബന്ധപ്പെട്ട നിയമ നിർമ്മാണവും വന്നു.
Source link
