അമേരിക്കയോട് കടുപ്പിച്ച് ഇന്ത്യ; ഹോർമുസിൽ സംഘർഷം കനക്കുന്നു, സ്വർണവില താഴേക്ക്

പശ്ചിമേഷ്യൻ യുദ്ധവും എണ്ണവിലക്കുതിപ്പും വിദേശ നിക്ഷേപകരുടെ കൂട്ടത്തോടെയുള്ള പിൻവാങ്ങലും ഉൾപ്പെടെയുള്ള കനത്ത തിരിച്ചടികളിൽ ഉലയുന്ന ഇന്ത്യൻ ഓഹരി വിപണിക്ക് ഈ ആഴ്ചയും നിർണായകവും അതികഠിനവുമായ പരീക്ഷണഘട്ടം.

പശ്ചിമേഷ്യയിൽ ഇറാനും യുഎസും തമ്മിലുള്ള സംഘർഷാവസ്ഥ ലഘുവാക്കാനുള്ള ഖത്തറിന്റെയും പാക്കിസ്ഥാന്റെയും നയതന്ത്ര ശ്രമങ്ങൾ പൂർണ പരാജയമായിരുന്നു. ഇരുരാജ്യങ്ങളും തമ്മിലുള്ള വാക്‌പോര് ഇപ്പോഴും തുടരുകയാണ്. ഇറാന്റെ മേലുള്ള ഉപരോധങ്ങളിൽ യാതൊരുവിധ ഇളവുകളും അനുവദിക്കാൻ തയ്യാറല്ലെന്ന് വ്യക്തമാക്കിയ യുഎസ് പ്രസിഡന്റ് ട്രംപ്, മേഖലയിലേക്ക് മൂന്നാം പടക്കപ്പലും 10,000 സൈനികരെക്കൂടി അയച്ചത് സ്ഥിതിഗതികൾ കൂടുതൽ സങ്കീർണ്ണമാക്കി. ഇതിനിടയിലാണ് എരിതീയിൽ എണ്ണയെന്നോണം ഹൂതികളും ആക്രമണങ്ങളുമായി രംഗത്തെത്തിയത്.

ഇന്ത്യ-യുഎസ് കരാർ ഉടനില്ല

ദ്വിരാഷ്ട്ര ബന്ധം ദൃഢമാക്കുന്നതിന്റെ ഭാഗമായി പ്രധാനമന്ത്രി നരേന്ദ്ര മോഡിയും യുഎസ് പ്രസിഡന്റ് ട്രംപും കഴിഞ്ഞ ആഴ്ച ടെലിഫോണിൽ ചർച്ചകൾ നടത്തിയിരുന്നു. എന്നാൽ ഇതിനു തൊട്ടുപിന്നാലെ, ഇന്ത്യ-യുഎസ് വ്യാപാരക്കരാർ ഉടൻ യാഥാർത്ഥ്യമാകില്ലെന്ന് യുഎസ് വ്യാപാര ചർച്ചാപ്രതിനിധി ജേമിസൺ ഗ്രീർ വ്യക്തമാക്കി. ഇരുവിഭാഗങ്ങൾക്കുമിടയിൽ ഒട്ടനവധി തർക്കവിഷയങ്ങളുണ്ടെന്നും അവ പരിഹരിക്കാനുള്ള ചർച്ചകൾ പുരോഗമിക്കുകയാണെന്നും അദ്ദേഹം അറിയിച്ചു. റഷ്യൻ എണ്ണ ഇറക്കുമതിയുടെ പേരിൽ 100 ശതമാനം തീരുവ ചുമത്തുമെന്ന് ഭീഷണിപ്പെടുത്തി ഇന്ത്യയെ സമ്മർദ്ദത്തിലാക്കാനുള്ള യുഎസിന്റെ തന്ത്രങ്ങളാണ് കരാറിന് പ്രധാന തടസ്സമായി നിൽക്കുന്നത്. കൂടാതെ, സെക്ഷൻ 301 പ്രകാരം ഇന്ത്യയ്ക്കെതിരെ യുഎസ് നടത്തിയ അന്വേഷണവും ഉഭയകക്ഷി ബന്ധത്തിൽ നിഴൽ വീഴ്ത്തുന്നുണ്ട്.

റഷ്യൻ എണ്ണ വാങ്ങുന്നത് തുടരുമെന്ന് ജയശങ്കറും ഗോയലും

ആരുടെയും ഭീഷണിക്ക് വഴങ്ങില്ലെന്നും എവിടെ നിന്ന് ഇന്ധനം വാങ്ങണമെന്ന് ഇന്ത്യ സ്വന്തമായി തീരുമാനിക്കുമെന്നും കേന്ദ്ര സർക്കാർ യുഎസിന് കത്തുവില നൽകിയിരുന്നു. റഷ്യൻ എണ്ണ ഇറക്കുമതി നിലയ്ക്കില്ലെന്നും തുടർന്നും വാങ്ങുമെന്നും വിദേശകാര്യ മന്ത്രി എസ്.ജയശങ്കർ എംപിമാരുടെ പാനലിന് മുമ്പാകെ വ്യക്തമാക്കി. റഷ്യയുമായുള്ള പരമ്പരാഗത ബന്ധം യാതൊരു മാറ്റവുമില്ലാതെ തുടരുമെന്നും അദ്ദേഹം പറഞ്ഞു.

കയറ്റുമതി, ഉൽപ്പാദനം, തൊഴിൽ മേഖലകളിലെ ചട്ടലംഘനങ്ങളും ചൂഷണങ്ങളും ചൂണ്ടിക്കാണിച്ചാണ് സെക്ഷൻ 301 പ്രകാരമുള്ള യുഎസ് അന്വേഷണം. എന്നാൽ ഇത്തരം അടിസ്ഥാനരഹിതമായ ആരോപണങ്ങൾ ഉന്നയിക്കുമ്പോൾ കൃത്യമായ തെളിവുകൾ ഹാജരാക്കണമെന്നും വെറും ഊഹാപോഹങ്ങളുടെ പുറത്താകരുത് നടപടികളെന്നും കേന്ദ്ര വാണിജ്യമന്ത്രി പീയുഷ് ഗോയൽ ശക്തമായ ഭാഷയിൽ തുറന്നടിച്ചു.

ഹൂതികളുടെ ആക്രമണം; എണ്ണവില വീണ്ടും കുതിപ്പിലേക്ക്

റിയാദിൽ തങ്ങൾ വ്യോമാക്രമണം നടത്തിയെന്ന് ഹൂതികൾ അവകാശപ്പെട്ടെങ്കിലും സൗദി സഖ്യസേന ഇത് നിഷേധിച്ചു. അതേസമയം, ഹോർമുസ് കടലിടുക്കിലൂടെ സഞ്ചരിക്കുകയായിരുന്ന കുവൈത്തിന്റെ ‘എംടി ഖാസിമം’ എന്ന എണ്ണ ടാങ്കറിന് നേരെയും ആക്രമണമുണ്ടായി. കപ്പലിലുണ്ടായിരുന്ന അഞ്ച് ഇന്ത്യൻ ജീവനക്കാരെയും സുരക്ഷിതമായി രക്ഷപ്പെടുത്തിയതായി ഒമാനിലെ ഇന്ത്യൻ എംബസി ഔദ്യോഗികമായി അറിയിച്ചു.

പശ്ചിമേഷ്യയിലെ യുദ്ധസാഹചര്യങ്ങൾ രൂക്ഷമാകുന്നത് ആഗോള വിപണിയിൽ കടുത്ത ഇന്ധനക്ഷാമത്തിന് കാരണമായേക്കാം. ഇത് പരിഹരിക്കുന്നതിനായി രാജ്യാന്തര എനർജി ഏജൻസിയിൽ (ഐഇഎ) അംഗമായ രാജ്യങ്ങൾ തങ്ങളുടെ കരുതൽ ശേഖരത്തിൽ നിന്ന് 32.5 കോടി ബാരൽ ക്രൂഡോയിലും 10 കോടി ബാരൽ ഡീസലും അടിയന്തരമായി വിപണിയിലെത്തിക്കാൻ ധാരണയായിട്ടുണ്ട്.

എങ്കിലും, അരാംകോയുടെ സൗകര്യങ്ങൾക്ക് നേരെ ഉൾപ്പെടെയുള്ള തുടർച്ചയായ ആക്രമണങ്ങൾ തിങ്കളാഴ്ച വിപണി തുറക്കുമ്പോൾ ക്രൂഡോയിൽ വിലയിൽ വൻ കുതിച്ചുചാട്ടത്തിന് വഴിയൊരുക്കിയേക്കാം. കഴിഞ്ഞ ആഴ്ച ബാരലിന് 99 ഡോളറിലേക്ക് ഇടിഞ്ഞ ബ്രെന്റ് ക്രൂഡ് വില നിലവിൽ 102.3 ഡോളറിലെത്തിയിട്ടുണ്ട്. അമേരിക്കൻ ഡബ്ല്യുടിഐ ക്രൂഡ് വിലയാകട്ടെ 89 ഡോളറിൽ നിന്ന് 91.11 ഡോളറായും ഉയർന്നു.

ഡോളറും ബോണ്ടും ഉയർത്തുന്ന ആശങ്കകൾ

ഇന്ധനക്ഷാമവും വിലക്കയറ്റവും ആഗോള തലത്തിലുണ്ടാക്കുന്ന പണപ്പെരുപ്പ ഭീതി തടയാൻ വിവിധ രാജ്യങ്ങളിലെ കേന്ദ്രബാങ്കുകൾ അടിസ്ഥാന പലിശനിരക്ക് ഇനിയും ഉയർത്തിയേക്കുമെന്ന സൂചനയാണ് വിപണിയെ തളർത്തുന്ന മറ്റൊരു പ്രധാന ഘടകം. അമേരിക്കയിൽ കഴിഞ്ഞ മാസത്തെ തൊഴിൽ കണക്കുകൾ പ്രവചനങ്ങളെല്ലാം തെറ്റിച്ച് ദയനീയമായി തകർന്നിരുന്നു. എങ്കിലും, പലിശനിരക്ക് വർധിപ്പിക്കുന്നതിൽ നിന്ന് ഫെഡറൽ റിസർവ് പൂർണ്ണമായി പിന്മാറില്ലെന്ന വിലയിരുത്തൽ നിക്ഷേപകരുടെ നെഞ്ചിടിപ്പ് കൂട്ടുന്നു.

പലിശ നിരക്കുകൾ ഇനിയും ഉയർന്നേക്കാമെന്ന വിലയിരുത്തലുകളെ തുടർന്ന് യുഎസ് ഡോളറും ബോണ്ട് യീൽഡും വർഷങ്ങൾക്ക് ശേഷമുള്ള ഏറ്റവും ഉയർന്ന നിരക്കുകളിലേക്ക് കുതിച്ചെത്തിയത് ഇന്ത്യൻ വിപണിക്ക് കനത്ത ആഘാതമായി. യുഎസ് ഡോളർ സൂചിക കഴിഞ്ഞ ആഴ്ച 102 ഭേദിച്ചു. 2025 ഏപ്രിലിനു ശേഷമുള്ള ഏറ്റവും ഉയർന്ന നിരക്കാണിത്. പത്തു വർഷത്തെ ട്രഷറി ബോണ്ട് യീൽഡ് 2022നു ശേഷമുള്ള ഏറ്റവും ഉയർന്ന നിരക്കായ 5.34 ശതമാനവും തൊട്ടു.

ബോണ്ട് നിക്ഷേപങ്ങളിൽ നിന്നുള്ള ആദായം വർധിച്ചതോടെ, വിദേശ നിക്ഷേപകർ ഇന്ത്യൻ ഓഹരി-കടപ്പത്ര വിപണികളിൽ നിന്ന് വൻതോതിൽ പണം പിൻവലിച്ച് ബോണ്ടുകളിലേക്ക് ചേക്കേറുകയാണ്. ഈ ആഗോള പ്രവണതയെ തുടർന്ന് തുടർച്ചയായ എട്ടാം ആഴ്ചയാണ് ഇന്ത്യൻ ഓഹരി വിപണി നഷ്ടത്തിലേക്ക് കൂപ്പുകുത്തുന്നത്. കഴിഞ്ഞ 25 വർഷത്തിനിടയിലെ ഏറ്റവും ദൈർഘ്യമേറിയ നഷ്ടക്കാലമാണിത്.

റിസർവ് ബാങ്കിന്റെ പണനയ യോഗം നാളെ

റിസർവ് ബാങ്കിന്റെ നിർണായകമായ പണനയ നിർണയ യോഗം നാളെ ആരംഭിക്കുന്നത് ഇന്ത്യൻ വിപണിയിൽ കൂടുതൽ ആശങ്ക സൃഷ്ടിക്കുന്നുണ്ട്. പണപ്പെരുപ്പം ഉയർന്ന നിലയിൽ തുടരുന്നതിനാൽ ഇന്ത്യയും പലിശ നിരക്ക് കൂട്ടുന്ന പാതയിലേക്ക് തിരിഞ്ഞേക്കാം. വരുന്ന ഒക്ടോബർ 7ന് പ്രഖ്യാപിക്കുന്ന പണനയത്തിൽ ആർബിഐ റിപ്പോ നിരക്ക് 0.25 ശതമാനം വർധിപ്പിച്ചേക്കുമെന്നാണ് വിലയിരുത്തൽ. ഡിസംബറിലെ യോഗത്തിലും സമാനമായ രീതിയിൽ നിരക്ക് കൂട്ടിയേക്കാം. ഇത് വായ്പകളുടെ തിരിച്ചടവ് ഭാരം വർധിപ്പിക്കുകയും കമ്പനികളുടെ പ്രവർത്തനച്ചെലവ് ഇരട്ടിയാക്കുകയും ചെയ്യും.

ഭവന, വാഹന, വ്യക്തിഗത വായ്പകളുടെ പലിശ നിരക്കുകൾ ഉയരുന്നത് സാധാരണക്കാരുടെ ജീവിതത്തെയും നേരിട്ട് ബാധിക്കും. ഇത് ഉപഭോക്തൃ വിപണിയുടെ വളർച്ചയ്ക്കും തിരിച്ചടിയാകും. കോർപ്പറേറ്റ് കമ്പനികളുടെ ജൂലൈ-സെപ്റ്റംബർ പാദത്തിലെ പ്രവർത്തനഫലങ്ങൾ ഉടൻ പുറത്തുവന്നു തുടങ്ങുമെന്നതും വിപണിക്ക് ആശങ്കയാണ്. ഫലങ്ങൾ നിരാശാജനകമായാൽ ഓഹരി വിപണിയിൽ വൻതോതിലുള്ള വിറ്റൊഴിയൽ തരംഗമുണ്ടായേക്കാം.

മുന്നേറ്റാനാവാതെ സ്വർണവില

യുഎസിൽ നിന്ന് പുറത്തുവന്ന നിരാശാജനകമായ തൊഴിൽ കണക്കുകളെ തുടർന്ന് ഔൺസിന് 4,200 ഡോളർ വരെ ഉയർന്നിരുന്ന രാജ്യാന്തര സ്വർണവിലയ്ക്ക് ആ നേട്ടം നിലനിർത്താനായില്ല. പലിശ നിരക്ക് ഉയരുമെന്ന ഭീതിയും ശക്തമായ ഡോളറും ബോണ്ട് യീൽഡും സ്വർണത്തിന് തിരിച്ചടിയായി. നിലവിൽ 31 ഡോളർ കുറഞ്ഞ് 4,140 ഡോളറിലാണ് രാജ്യാന്തര വിപണിയിൽ വില.

രാജ്യാന്തര വെള്ളിവിലയും 62 ഡോളർ വരെ എത്തിയ ശേഷം ഇടിഞ്ഞ് 60.4 ഡോളറിലെത്തി. കേരളത്തിൽ ഇന്നലെ ഗ്രാമിന് 100 രൂപ കുറഞ്ഞ് സ്വർണവില 13,675 രൂപയായിരുന്നു. പവന് 800 രൂപ കുറഞ്ഞ് 1,09,400 രൂപയുമായി. 18 കാരറ്റ് സ്വർണവില ഗ്രാമിന് 80 രൂപ താഴ്ന്ന് 11,235 രൂപയിലെത്തി. എന്നാൽ വെള്ളിവിലയിൽ മാറ്റമില്ലാതെ ഗ്രാമിന് 235 രൂപയിൽ തുടരുന്നു.