കർണാടകയിലും തമിഴ്നാട്ടിലും നിന്ന് കേരളത്തിലേക്കെത്തുന്ന ഈ ‘വസ്തു’ വലിയ അപകടമോ? മലയാളികളുടെ ജീവനും ആരോഗ്യത്തിനും ഭീഷണിയാകുന്നത് എന്ത്?

ഫയൽ ചിത്രം

കണ്ണൂർ: പുലർച്ചെ നഗരങ്ങൾ സജീവമാകുന്നതിന് മുമ്പ് തന്നെ ജില്ലയിലെ പച്ചക്കറി ചന്തകളിലേക്ക് ലോറികൾ എത്തിച്ചേരും. തമിഴ്നാട്ടിൽ നിന്നും കർണാടകത്തിൽ നിന്നും തക്കാളി, ബീൻസ്, കാരറ്റ്, കാബേജടക്കമുള്ള പച്ചക്കറികളും മുളക്, വിവിധയിനം ഇലക്കറികൾ, പഴങ്ങൾ എന്നിവയാണ് പ്രധാനമായും ഇവിടേക്ക് കൊണ്ടുവരുന്നത്. എന്നാൽ, ഇവ ജനങ്ങളുടെ തീൻമേശകളിലെത്തുന്നതിന് മുൻപ് ഭക്ഷ്യയോഗ്യമാണോയെന്നും അപകടകരമായ വിഷാംശങ്ങൾ അടങ്ങിയിട്ടുണ്ടോയെന്നും കാര്യമായി പരിശോധിക്കാൻ സംവിധാനമില്ലാത്തത് ഗുരുതരമായ ആരോഗ്യപ്രശ്നങ്ങൾ സൃഷ്ടിക്കുമെന്ന ആശങ്ക ശക്തമാണ്.

ജില്ലയുടെ കിഴക്കൻ അതിർത്തി പ്രദേശമായ ഇരിട്ടി കൂട്ടുപുഴ വഴിയാണ് ഇതര സംസ്ഥാനങ്ങളിൽ നിന്നുമുള്ള പച്ചക്കറി ലോഡുകളിൽ സിംഹഭാഗവും കടന്നുവരുന്നത്. തുടർന്ന് കണ്ണൂർ, തലശ്ശേരി, പയ്യന്നൂർ, തളിപ്പറമ്പ് തുടങ്ങിയ പ്രധാന ചന്തകളിലേക്കും അവിടം വഴി ചെറുകടകളിലേക്കും ഈ സാധനങ്ങൾ വിതരണം ചെയ്യപ്പെടുന്നു.

മുമ്പുണ്ടായിരുന്ന തരത്തിലുള്ള കൃത്യമായ പരിശോധനാ സംവിധാനങ്ങൾ ഇപ്പോൾ നിലവിലില്ലെന്ന് ഉപഭോക്താക്കളും വ്യാപാരികളും ഒരുപോലെ ചൂണ്ടിക്കാണിക്കുന്നു. പച്ചക്കറി ഉൽപാദനവേളയിൽ വ്യാപകമായി കീടനാശിനികളും രാസവസ്തുക്കളും തളിക്കുന്നതിനാൽ അവയുടെ അവശേഷിപ്പുകൾ വിളകളിൽ തങ്ങിനിൽക്കാൻ സാധ്യതയുണ്ട്. പരിശോധനകൾ കാര്യക്ഷമമല്ലെങ്കിൽ സുരക്ഷിതമല്ലാത്തതും ഗുണനിലവാരമില്ലാത്തതുമായ ഭക്ഷ്യവസ്തുക്കൾ നേരിട്ട് ഉപഭോക്താക്കളുടെ കൈകളിലെത്താനുള്ള സാധ്യതയാണ് ഇതുവളർത്തുന്നത്.

ഭക്ഷ്യസുരക്ഷാ നിയമം-2006 പ്രകാരം ഭക്ഷ്യസാധനങ്ങളിലെ കീടനാശിനി അവശിഷ്ടങ്ങൾക്ക് കൃത്യമായ പരമാവധി പരിധി (എം.ആർ.എൽ) നിർവചിച്ചിട്ടുണ്ട്. ഈ നിയമം നടപ്പിലാക്കേണ്ട പ്രധാന ബാധ്യത ഭക്ഷ്യസുരക്ഷാ വകുപ്പിനാണ് ഉള്ളത്. ജില്ലാതലങ്ങളിൽ നിന്നും ഉദ്യോഗസ്ഥർ സാമ്പിളുകൾ ശേഖരിച്ച് അംഗീകൃത പരിശോധനാ കേന്ദ്രങ്ങളിലേക്ക് അയക്കുകയാണ് പതിവുരീതി. മുൻകാലങ്ങളിലെ ചില പരിശോധനകളിൽ ഇതര സംസ്ഥാനങ്ങളിൽ നിന്നെത്തിയ ചില ഇലവർഗങ്ങൾ, മുളക്, കാപ്സിക്കം എന്നിവയിൽ അനുവദനീയമായതിലും അധികം അളവിൽ രാസാവശിഷ്ടങ്ങൾ കണ്ടെത്തിയതായി വിവരങ്ങളുണ്ട്. പക്ഷേ, ലാബ് പരിശോധനാ ഫലം വൈകിയെത്തുന്നത് ഇത്തരം നടപടികൾക്ക് തടസ്സമാകുന്നുണ്ട്. ഫലം പുറത്തുവരുമ്പോഴേക്കും ബന്ധപ്പെട്ട ഉൽപന്നങ്ങൾ വിറ്റഴിഞ്ഞുപോയിട്ടുണ്ടാകും. അതിനാൽ അതിർത്തികളിൽ വെച്ചുതന്നെ വളരെ വേഗത്തിൽ പരിശോധനകൾ നടത്താനുള്ള ആധുനിക സൗകര്യങ്ങൾ ഏർപ്പെടുത്തണമെന്നാണ് ഇതിനുള്ള പ്രധാന പ്രതിവിധിയായി നിർദേശിക്കപ്പെടുന്നത്.

ദ്രുത പരിശോധനാ സംവിധാനങ്ങൾ നടപ്പിലാക്കണം

1. കൂട്ടുപുഴ ഉൾപ്പെടെയുള്ള എല്ലാ അതിർത്തി ചെക്ക്പോസ്റ്റുകളിലും സ്പോട്ട് ടെസ്റ്റിംഗ് സംവിധാനങ്ങൾ കൊണ്ടുവരണം

2. കണ്ണൂർ ഉൾപ്പെടെയുള്ള പ്രധാന ചന്തകളിൽ കൃത്യമായ ഇടവേളകളിൽ സാമ്പിൾ ശേഖരണവും ലാബ് പരിശോധനയും ഉറപ്പാക്കണം

3. പച്ചക്കറികളിൽ വിഷാംശം കണ്ടെത്തിയാൽ ആ ഉൽപന്നങ്ങൾ ഉടൻ വിപണിയിൽ നിന്നും പിൻവലിക്കുകയും വിതരണക്കാർക്കെതിരെ ശക്തമായ നിയമനടപടി സ്വീകരിക്കുകയും വേണം.

4. പരിശോധനകളുടെ ഫലം അപ്പപ്പോൾ തന്നെ പൊതുജനങ്ങളുടെ അറിവിലേക്കായി പ്രസിദ്ധീകരിക്കണം

നാടൻ ജൈവകൃഷിയെ പ്രോത്സാഹിപ്പിക്കുക

അയൽ സംസ്ഥാനങ്ങളെ പൂർണ്ണമായി ആശ്രയിക്കുന്ന അവസ്ഥ ഒഴിവാക്കാനായി ജൈവരീതിയിലുള്ള പച്ചക്കറി ഉൽപാദനം വ്യാപിപ്പിക്കണമെന്ന ആവശ്യവും ശക്തമാണ്. ഈ മേഖലയിൽ ജില്ലയിൽ നിർണായക പങ്കുവഹിക്കുന്നത് കുടുംബശ്രീയുടെ കീഴിലുള്ള ജെ.എൽ.ജി (ജോയിന്റ് ലയബിലിറ്റി ഗ്രൂപ്പ്) കൂട്ടായ്മകളാണ്.

കണ്ണൂർ ജില്ലയിലെ 2024-25 വർഷത്തെ ഔദ്യോഗിക കണക്കുകൾ പ്രകാരം 6,098 ജെ.എൽ.ജി സംഘങ്ങളിലായി ആകെ 30,015 വനിതാ കർഷകരാണ് സജീവമായി ഉള്ളത്. ഇതിൽ 748 ഗ്രൂപ്പുകൾ പച്ചക്കറി കൃഷി മാത്രമാണ് ചെയ്യുന്നത്, ഏകദേശം 156 ഹെക്ടർ സ്ഥലത്ത്. നെല്ല്, വിവിധ കിഴങ്ങുവർഗങ്ങൾ, പൂക്കൾ എന്നിവയുൾപ്പെടെ ആകെ കൃഷി ചെയ്യപ്പെടുന്ന വിസ്തൃതി ഏകദേശം 435 ഹെക്ടറോളം വരും. മുൻവർഷത്തെ കണക്കുകൾ പരിശോധിച്ചാൽ 465 ഗ്രൂപ്പുകളിലായി ഏകദേശം 154 ഹെക്ടറിലായിരുന്നു പച്ചക്കറി കൃഷി ഉണ്ടായിരുന്നത്. ഒരു വർഷത്തിനിടയിൽ പച്ചക്കറി കൃഷിയിലേക്ക് തിരിഞ്ഞ ഗ്രൂപ്പുകളുടെ എണ്ണത്തിൽ വലിയ വർദ്ധനവുണ്ടായെങ്കിലും മൊത്തത്തിലുള്ള കൃഷിഭൂമിയുടെ വിസ്തൃതിയിൽ കാര്യമായ മാറ്റമില്ലാതെ തുടരുകയാണ്.

RELATED TOPICS: TOMATO PRICE, BEANS PRICE, KARNATAKA TOMATO, TAMIL NADU VEGETABLES