ജീവിതത്തിലേക്ക് മൂന്നുപേരെ കൈപിടിച്ചുയർത്തി ധീരതയുടെ കാവൽക്കാരായി ശ്രീസുഖും സന്തോഷും

തൃപ്പൂണിത്തുറ∙ ചോരപുരണ്ട വാക്കത്തിയുമായി നിന്ന അക്രമിയെ കീഴ്പ്പെടുത്തി, എരൂരിൽ മൂന്ന് ജീവനുകൾ രക്ഷിച്ച അയൽവാസികളുടെ ധീരത നാടിന് മാതൃകയാകുന്നു. എരൂർ ഇല്ലിക്കപ്പടിയിൽ കഴിഞ്ഞ ബുധനാഴ്ച രാത്രിയുണ്ടായ ദാരുണമായ സംഭവത്തിൽ മൂന്ന് പേരുടെ ജീവൻ രക്ഷപ്പെട്ടത് രണ്ട് അയൽവാസികളുടെ അസാമാന്യ ധൈര്യവും സമയോചിത ഇടപെടലും കൊണ്ടുമാത്രമാണ്.

നഗരസഭയിലെ താൽക്കാലിക ജീവനക്കാരനായ ദിലീപ്, മദ്യലഹരിയിലെത്തി വാക്കത്തിയുമായി ഭാര്യയെയും മാതാപിതാക്കളെയും വെട്ടിക്കൊല്ലാൻ ശ്രമിക്കുന്നതിനിടയാണ് അയൽവാസികളായ ഹൈക്കോടതി ജീവനക്കാരി ശ്രീസുഖയും റെയിൽവേ ജീവനക്കാരനായ സന്തോഷ് കുമാറും രക്ഷാകർത്താക്കളായി ഓടിയെത്തിയത്.

അപകടത്തിന്റെ ഭീകരത പെട്ടെന്ന് തന്നെ തിരിച്ചറിഞ്ഞ സന്തോഷ്, ഒട്ടും സമയം കളയാതെ ദിലീപിന്റെ കയ്യിൽനിന്ന് വാക്കത്തി തട്ടിയെടുത്തു ശ്രീസുഖയ്ക്ക് കൈമാറുകയായിരുന്നു. ഈ സാഹസിക നീക്കത്തിലൂടെ വലിയൊരു ദുരന്തമാണ് ഇരുവരും ചേർന്ന് ഒഴിവാക്കിയത്.