മരണശേഷം മണ്ണടിയാം: ടെറാമേഷൻ എന്ന വിപ്ലവകരമായ മാറ്റത്തിന് തുടക്കമിട്ട് ന്യൂ സൗത്ത് വെയിൽസ്
സിഡ്‌നി∙ മരണശേഷം മൃതദേഹം മണ്ണടക്കം ചെയ്യുന്നതിനും ദഹിപ്പിക്കുന്നതിനും പകരമായി പുതിയൊരു സംസ്കാര രീതിക്ക് നിയമപരമായ അനുമതി നൽകാൻ ഒരുങ്ങുകയാണ് ഓസ്‌ട്രേലിയയിലെ ന്യൂ സൗത്ത് വെയിൽസ്. ‘ഹ്യൂമൻ കോമ്പോസ്റ്റിങ്’ അഥവാ ‘ടെറാമേഷൻ’ എന്നറിയപ്പെടുന്ന ഈ അത്യാധുനിക രീതിയിൽ, മനുഷ്യശരീരത്തെ ശാസ്ത്രീയമായി പ്രകൃതിദത്തമായ ജൈവ വളമാക്കി മാറ്റുന്നു.
ഈ പ്രക്രിയ പൂർത്തിയായ ശേഷം ലഭിക്കുന്ന ജൈവ അവശിഷ്ടങ്ങൾ ബന്ധുക്കൾക്ക് ഏറ്റുവാങ്ങാം. ആരോഗ്യസുരക്ഷാ മാനദണ്ഡങ്ങളും നിയമങ്ങളും അനുശാസിക്കുന്ന പരിധിക്കുള്ളിൽ നിന്നുകൊണ്ട്, ഈ വളം തോട്ടങ്ങളിലും സ്മാരകമായി മരങ്ങൾ നട്ടുപിടിപ്പിക്കാനും ഉപയോഗിക്കാൻ സാധിക്കും. എന്നിരുന്നാലും, ലഭിക്കുന്ന വസ്തുവിനെ സാധാരണ മണ്ണായി കണക്കാക്കാൻ കഴിയില്ലെന്നും, ഇതിന്റെ വിനിയോഗം സർക്കാർ നിശ്ചയിച്ചിട്ടുള്ള കർശനമായ ചട്ടങ്ങൾക്കും മാർഗനിർദേശങ്ങൾക്കും വിധേയമായിരിക്കുമെന്നും അധികൃതർ വ്യക്തമാക്കുന്നു.
വ്യക്തിയുടെ താൽപര്യങ്ങൾക്കാണ് ഈ പുതിയ സംവിധാനത്തിൽ മുൻഗണന നൽകുന്നത്. ഇത്തരത്തിൽ മൃതദേഹം സംസ്കരിക്കുന്നതിന് കൃത്യമായ സമ്മതപത്രങ്ങളും നിയമപരമായ നടപടിക്രമങ്ങളും പൂർത്തിയാക്കേണ്ടതുണ്ട്. അമേരിക്കയിലെ വിവിധയിടങ്ങളിൽ ഇതിനകം തന്നെ ഈ രീതിക്ക് നിയമസാധുത ലഭിച്ചിട്ടുണ്ട്. പരിസ്ഥിതിക്ക് ഏൽക്കുന്ന ആഘാതം പരമാവധി കുറയ്ക്കുന്നതിനൊപ്പം, പരമ്പരാഗത രീതികൾക്ക് പുറമേ കൂടുതൽ ബദൽ മാർഗങ്ങൾ പൊതുജനങ്ങൾക്ക് ലഭ്യമാക്കുക എന്നതാണ് ഈ പദ്ധതിയുടെ ലക്ഷ്യമെന്ന് ഇതിനെ അനുകൂലിക്കുന്നവർ ചൂണ്ടിക്കാട്ടുന്നു.
