റഷ്യൻ എണ്ണയുടെ പേരിൽ ഇന്ത്യയെ പഞ്ഞിക്കിട്ട അമേരിക്കയും റഷ്യയും യൂറോപ്പുമായി കച്ചവടക്കളിയിൽ

റഷ്യയിൽനിന്ന് എണ്ണ വാങ്ങിയതിന്റെ പേരിൽ ഇന്ത്യയെ മാത്രം ലക്ഷ്യമിട്ട് ഉപരോധങ്ങളും ഉയർന്ന തീരുവയും ചുമത്തുമെന്ന് ഭീഷണിപ്പെടുത്തിയ അമേരിക്ക, അതേ റഷ്യയുമായി ചേർന്ന് യൂറോപ്പിലേക്ക് വാതക വ്യാപാരത്തിന് കളംൊരുക്കുന്നു. പ്രമുഖ വാർത്താ ഏജൻസിയായ റോയിട്ടേഴ്സ് ആണ് ഈ വിവരം പുറത്തുവിട്ടിരിക്കുന്നത്.

യുക്രെയ്നെതിരായ റഷ്യൻ യുദ്ധത്തിന് സാമ്പത്തിക സഹായം നൽകുന്നത് ഇന്ത്യയാണെന്നും, ഇന്ത്യ നൽകുന്നത് ‘ചോരപ്പണമാണെന്നും’ യുഎസ് പ്രസിഡന്റ് ഡൊണാൾഡ് ട്രംപിന്റെ വ്യാപാര ഉപദേഷ്ടാവ് പീറ്റർ നവാരോ ഉൾപ്പെടെയുള്ളവർ മുൻപ് കടുത്ത വിമർശനം ഉന്നയിച്ചിരുന്നു. റഷ്യൻ ഊർജോൽപ്പന്നങ്ങൾക്ക് മേൽ അമേരിക്കയും യൂറോപ്യൻ യൂണിയനും കർശന ഉപരോധം തുടരുകയുമാണ്. ഇതിനിടയിലാണ് യുഎസും റഷ്യയും ഒന്നിച്ച് യൂറോപ്പിലേക്ക് ഗ്യാസ് കയറ്റി അയക്കാൻ പദ്ധതിയിടുന്നത്.

ട്രംപിന്റെ മരുമകനും നയതന്ത്ര ചർച്ചകളിലെ യുഎസിന്റെ പ്രത്യേക പ്രതിനിധിയുമായ ജേർഡ് കുഷ്നറും, പുട്ടിന്റെ ഉപദേശകനും റഷ്യൻ ഡയറക്ട് ഇൻവെസ്റ്റ്മെന്റ് ഫണ്ട് ഡയറക്ടറുമായ കിറിൽ ദിമിത്രേവും തമ്മിൽ മോസ്കോയിലും ന്യൂയോർക്കിലുമായി രഹസ്യ കൂടിക്കാഴ്ചകൾ നടത്തിയതായി റിപ്പോർട്ടിൽ വ്യക്തമാക്കുന്നു. റഷ്യയിൽ നിന്ന് ജർമനിയിലേക്ക് നീളുന്ന ‘നോർഡ് സ്ട്രീം’ വാതക പൈപ്പ്‍ലൈൻ പുനരുജ്ജീവിപ്പിച്ച് വിതരണം ആരംഭിക്കാനാണ് പ്രധാനമായും ചർച്ചകൾ പുരോഗമിക്കുന്നത്.

എങ്കിലും, റഷ്യയുടെയും യുഎസിന്റെയും ഈ സംയുക്ത നീക്കത്തിന് യൂറോപ്പിൽ നിന്ന് തന്നെ കടുത്ത എതിർപ്പ് നേരിടേണ്ടി വരുമെന്നാണ് വിലയിരുത്തപ്പെടുന്നത്. ഇതിന് പ്രധാനമായും ചില തടസ്സങ്ങളുണ്ട്:

ഒന്നാമതായി, നോർഡ് സ്ട്രീം പൈപ്പ്‍ലൈനുകൾക്ക് യൂറോപ്യൻ യൂണിയന്റെ ഉപരോധമുണ്ട്. രണ്ടാമതായി, യുക്രെയ്ൻ യുദ്ധം ആരംഭിച്ച 2022 മുതൽ ഈ പൈപ്പ്‍ലൈനിന്റെ ലൈസൻസ് ജർമനി പുതുക്കിയിട്ടില്ല. മാത്രമല്ല, ലൈസൻസ് പുതുക്കി നൽകാൻ ഉദ്ദേശിക്കുന്നില്ലെന്നും ജർമനി നിലപാട് വ്യക്തമാക്കിക്കഴിഞ്ഞു. കൂടാതെ, യുദ്ധത്തിനിടയിൽ പൈപ്പ്‍ലൈന് കാര്യമായ കേടുപാടുകൾ സംഭവിക്കുകയും ചെയ്തിട്ടുണ്ട്. നിലവിലുള്ള ഉപരോധം മൂലം നോർഡ് സ്ട്രീം-1ന്റെ അറ്റകുറ്റപ്പണികളും റഷ്യ നിർത്തിവെച്ചിരിക്കുകയാണ്. 2010-ൽ 1100 കോടി ഡോളർ ചെലവഴിച്ചാണ് നോർഡ് സ്ട്രീം പദ്ധതി യാഥാർത്ഥ്യമാക്കിയത്.

അതേസമയം, റോയിട്ടേഴ്സിന്റെ ഈ റിപ്പോർട്ട് വൈറ്റ് ഹൗസ് തള്ളിക്കളഞ്ഞതായി വിവരമുണ്ട്. നോർഡ് സ്ട്രീം പൈപ്പ്‍ലൈനുമായി ബന്ധപ്പെട്ട് യാതൊരു ചർച്ചയും നടന്നിട്ടില്ലെന്നും, അമേരിക്കൻ നികുതിദായകർക്കും കമ്പനികൾക്കും ഗുണകരമല്ലാത്ത യാതൊരു പദ്ധതിയും നിലവിൽ പരിഗണനയിലില്ലെന്നുമാണ് വൈറ്റ് ഹൗസിന്റെ ഔദ്യോഗിക വിശദീകരണം.