തിരുവനന്തപുരം∙ ചേരാനല്ലൂരിലുണ്ടായ അപകടത്തിന്റെ പശ്ചാത്തലത്തിൽ പൊലീസ് ഉദ്യോഗസ്ഥർക്കെതിരെ സ്വീകരിച്ച അച്ചടക്ക നടപടികളിൽ അതൃപ്തി പ്രകടിപ്പിച്ച് കേരള പൊലീസ് ഓഫീസേഴ്സ് അസോസിയേഷൻ രംഗത്ത്. തിരുവനന്തപുരത്ത് ചേർന്ന സംഘടനയുടെ സംസ്ഥാന നിർവാഹക സമിതി യോഗത്തിൽ പാസാക്കിയ പ്രമേയത്തിലൂടെയാണ് ഉന്നതതല തീരുമാനങ്ങൾക്കെതിരെ പരോക്ഷ വിമർശനമുയർന്നത്.
മുൻകാലങ്ങളിൽ ശരിയെന്നു കരുതി സ്വീകരിച്ച നടപടികൾ പിന്നീട് തെറ്റാണെന്നു വ്യാഖ്യാനിച്ച് ഉദ്യോഗസ്ഥരെ ശിക്ഷിക്കുന്ന പ്രവണത നീതീകരിക്കാനാവില്ലെന്ന് സംഘടന ചൂണ്ടിക്കാട്ടുന്നു. ഒരു കാലഘട്ടത്തിൽ നിയമപരമെന്നു വിലയിരുത്തപ്പെട്ട കാര്യങ്ങൾ കാലപ്പഴക്കത്തിൽ തെറ്റായി വ്യാഖ്യാനിക്കപ്പെടാം. ഇത്തരം സാഹചര്യങ്ങളിൽ, ഉത്തരവ് അനുസരിച്ചാണോ ഉദ്യോഗസ്ഥർ പ്രവർത്തിച്ചത് എന്നതുപോലും പരിഗണിക്കാതെ, കേവലം ആര് ചെയ്തു എന്നതിനെ മാത്രം അടിസ്ഥാനമാക്കി കുറ്റക്കാരാക്കുന്ന രീതി ശരിയല്ല. ഉദ്യോഗസ്ഥരുടെ മനോവീര്യം തകർക്കുന്ന ഇത്തരം നടപടികൾക്കു പകരം, നിയമത്തിന്റെ വഴിയിൽ മാത്രം മുന്നോട്ടുപോകാൻ അധികൃതർ തയ്യാറാകണമെന്ന് അസോസിയേഷൻ പ്രമേയത്തിലൂടെ ആവശ്യപ്പെട്ടു.
