കള്ളനോട്ട് നിർമ്മാണ യൂണിറ്റും തിമിംഗല ഛർദ്ദിയും: സിബിയോൺ ക്രൈംബ്രാഞ്ച് കസ്റ്റഡിയിൽ
കൊല്ലം∙ വ്യാജനോട്ട് കേസുമായി ബന്ധപ്പെട്ട് ജുഡീഷ്യൽ കസ്റ്റഡിയിൽ കഴിയുന്ന വെസ്റ്റ് കൈക്കുളങ്ങര വാടി കല്ലേലിവയൽ പുരയിടത്തിൽ സിബിയോണിനെ (37) അഞ്ച് ദിവസത്തെ ചോദ്യം ചെയ്യലിനായി ജില്ലാ ക്രൈംബ്രാഞ്ച് കസ്റ്റഡിയിൽ വാങ്ങി. കൊല്ലം ഒന്നാം ക്ലാസ് മജിസ്‌ട്രേറ്റ് കോടതിയിലാണ് അന്വേഷണസംഘം ഇതിനായുള്ള അപേക്ഷ സമർപ്പിച്ചത്. ഹൈക്കോടതിയിൽ പ്രതി നൽകിയിട്ടുള്ള ജാമ്യാപേക്ഷയെ പ്രോസിക്യൂഷൻ ശക്തമായി എതിർക്കുകയും ചെയ്തു.
കഴിഞ്ഞ 17-ാം തീയതി ആശ്രാമം ഭാഗത്തുനിന്ന് സിബിയോണിനെ കാണാതായെന്നും തട്ടിക്കൊണ്ടുപോയെന്നും ആരോപിച്ച് ഭാര്യ പള്ളിത്തോട്ടം പോലീസ് സ്റ്റേഷനിൽ പരാതി നൽകിയിരുന്നു. ഇതിന്റെ അടിസ്ഥാനത്തിൽ, സിബിയോണിനെ ഫോൺ വിളിച്ച് വരുത്തിയ മയ്യനാട് കൂട്ടിക്കട സ്വദേശി ആദർശിനെ പോലീസ് പിടികൂടുകയും ചെയ്തിരുന്നു. എന്നാൽ തൊട്ടടുത്ത ദിവസം തന്നെ സ്റ്റേഷനിലെത്തിയ സിബിയോൺ, തട്ടിക്കൊണ്ടുപോയ സംഘത്തിന്റെ പിടിയിൽനിന്ന് താൻ തലനാരിഴയ്ക്ക് രക്ഷപ്പെട്ടെന്നും, അവർ കവർന്ന സ്വർണ്ണ മോതിരവും സ്കൂട്ടറും തിരികെ ലഭിച്ചെന്നും മൊഴി നൽകി.
സിബിയോണിന്റെ മൊഴികളിലെ വൈരുദ്ധ്യവും സംശയാസ്പദമായ പെരുമാറ്റവും ശ്രദ്ധയിൽപ്പെട്ട സ്പെഷൽ ബ്രാഞ്ച്, ഇയാളെക്കുറിച്ച് കൃത്യമായ അന്വേഷണം വേണമെന്ന് ഉന്നത ഉദ്യോഗസ്ഥരോട് ശുപാർശ ചെയ്തിരുന്നു. തുടർന്ന് ഡാൻസാഫ് സംഘവും സ്പെഷൽ ബ്രാഞ്ചും സിബിയോണിനെ രഹസ്യനിരീക്ഷണത്തിലാക്കി. ഇതിനിടയിൽ ലഭിച്ച കൃത്യമായ രഹസ്യവിവരത്തിന്റെ അടിസ്ഥാനത്തിൽ 23-ാം തീയതി രാത്രി സിബിയോണിന്റെ വീട്ടിൽ പോലീസ് നടത്തിയ അപ്രതീക്ഷിത പരിശോധനയിലാണ് കള്ളനോട്ട് കണ്ടെടുത്തത്.
അതേസമയം, സിബിയോണിനെ തട്ടിക്കൊണ്ടുപോയെന്ന കേസിൽ പള്ളിത്തോട്ടം പോലീസ് അറസ്റ്റ് ചെയ്ത ആദർശ് ബാബുവിനെ ക്രൈംബ്രാഞ്ച് സംഘം വിപുലമായി ചോദ്യം ചെയ്തു വരികയാണ്. കൃത്യത്തിൽ പങ്കാളികളായ മറ്റുള്ളവരെക്കുറിച്ചുള്ള വിവരങ്ങൾ ലഭിച്ചതായും കള്ളനോട്ട് ഇടപാടുകൾക്ക് പിന്നിൽ ദുരൂഹമായ സാമ്പത്തിക കണ്ണികളുണ്ടോയെന്നും അന്വേഷണ ഉദ്യോഗസ്ഥർ പരിശോധിച്ചു വരുന്നു.
