പെണ്ണുകിട്ടാത്തവർക്ക് വധുവിനെ കണ്ടെത്തും; വോട്ട് ചോദിച്ച് വ്യത്യസ്ത വാഗ്ദാനവുമായി കോൺഗ്രസ് എംഎൽഎ
ജയ്പുർ ∙ രാജസ്ഥാനിലെ പഞ്ചായത്ത് തിരഞ്ഞെടുപ്പ് പ്രചാരണത്തിനിടെ വോട്ടർമാർക്ക് വിചിത്ര വാഗ്ദാനവുമായി കോൺഗ്രസ് എംഎൽഎ രംഗത്ത്. തങ്ങളുടെ സ്ഥാനാർഥിക്ക് വോട്ട് ചെയ്താൽ, വിവാഹം നടക്കാൻ പ്രയാസപ്പെടുന്ന യുവാക്കൾക്ക് വധുവിനെ കണ്ടെത്തി നൽകാൻ സഹായിക്കാമെന്ന സൂരജ്ഗഡ് എംഎൽഎ ഷർവൺ കുമാറിന്റെ പ്രസ്താവനയാണ് വിവാദമായിരിക്കുന്നത്. ജുൻജുനു ജില്ലയിൽ തിരഞ്ഞെടുപ്പ് യോഗത്തിൽ സംസാരിക്കവെയാണ്, മക്കളുടെ വിവാഹം നടത്തിത്തരാൻ താൻ തയാറാണെന്ന് അദ്ദേഹം ജനങ്ങളോട് പറഞ്ഞത്.
നേരത്തെ, കഴിഞ്ഞ സെപ്റ്റംബറിൽ നടന്ന നഗരസഭാ തിരഞ്ഞെടുപ്പിലും സമാനമായ ഒരു സംഭവം റിപ്പോർട്ട് ചെയ്തിരുന്നു. അന്ന് ബിജെപി നേതാവും മുൻ എംഎൽഎയുമായ രാംലാൽ ശർമയാണ് ഇത്തരമൊരു വാഗ്ദാനവുമായി എത്തിയത്. വിവാഹത്തിനായി പെൺകുട്ടിയെ കണ്ടെത്താൻ സഹായിക്കണമെന്ന് അഭ്യർഥിച്ചുകൊണ്ട് ഒരു യുവാവ് തനിക്ക് കത്തെഴുതിയിരുന്നെന്നും, അതിന് മറുപടിയായാണ് താൻ അത്തരമൊരു പരാമർശം നടത്തിയതെന്നും ശർമ പിന്നീട് വിശദീകരിച്ചിരുന്നു.
രാജസ്ഥാനിലെ ലിംഗാനുപാതത്തിലെ അസന്തുലിതാവസ്ഥയാണ് ഇത്തരം തിരഞ്ഞെടുപ്പ് വാഗ്ദാനങ്ങൾക്ക് പിന്നിലെന്നാണ് വിലയിരുത്തൽ. 2011-ലെ സെൻസസ് പ്രകാരം രാജസ്ഥാനിലെ ലിംഗാനുപാതം 1,000 പുരുഷന്മാർക്ക് 928 സ്ത്രീകൾ എന്ന നിലയിലാണ്; ഇത് ദേശീയ ശരാശരിയായ 943-നേക്കാൾ വളരെ കുറവാണ്. നാല് ഘട്ടങ്ങളിലായി നടക്കുന്ന രാജസ്ഥാൻ പഞ്ചായത്ത് തിരഞ്ഞെടുപ്പിൽ, ആദ്യഘട്ടം ഇതിനകം പൂർത്തിയായിക്കഴിഞ്ഞു. ശേഷിക്കുന്ന ഘട്ടങ്ങളിലേക്കുള്ള ശക്തമായ പ്രചാരണത്തിലാണ് മുന്നണികൾ ഇപ്പോൾ ഏർപ്പെട്ടിരിക്കുന്നത്.
