ഓസ്‌ലോ ∙ 2026 ലെ സമാധാന നൊബേൽ പുരസ്കാരം പ്രമുഖ ഇന്ത്യൻ വംശജയും രാജ്യാന്തര മനുഷ്യാവകാശ പ്രവർത്തകയുമായ നവനീതം പിള്ളയ്ക്ക്. ദക്ഷിണാഫ്രിക്കയിൽ നിന്നുള്ള പ്രമുഖ നിയമജ്ഞയായ അവർ, 2008 മുതൽ 2014 വരെ ഐക്യരാഷ്ട്ര സംഘടനയുടെ മനുഷ്യാവകാശ ഹൈക്കമ്മിഷണർ പദവി അലങ്കരിച്ചിട്ടുണ്ട്. രാജ്യാന്തര തലത്തിലും ദക്ഷിണാഫ്രിക്കയിലും വർണ, ലിംഗ, വംശീയ വിവേചനങ്ങൾക്കെതിരെ വിട്ടുവീഴ്ചയില്ലാത്ത പോരാട്ടം നയിച്ച വ്യക്തിയാണ് നവനീതം പിള്ള.
നാറ്റൽ സർവകലാശാലയിൽ നിന്ന് ബിഎ, എൽഎൽബി ബിരുദങ്ങൾ സ്വന്തമാക്കിയ ശേഷമാണ് അവർ ഉപരിപഠനത്തിനായി അമേരിക്കയിലേക്ക് തിരിച്ചത്. ഹാർവഡ് ലോ സ്കൂളിൽ നിന്ന് എൽഎൽഎമ്മും 1988-ൽ നിയമത്തിൽ ഡോക്ടറേറ്റും നേടി. ഹാർവഡിൽ നിന്ന് ഡോക്ടറേറ്റ് കരസ്ഥമാക്കുന്ന ആദ്യ ദക്ഷിണാഫ്രിക്കക്കാരി എന്ന അപൂർവ്വ നേട്ടവും നവനീതത്തിന് സ്വന്തമാണ്. 1967-ൽ നാറ്റൽ പ്രവിശ്യയിൽ സ്വന്തമായി നിയമസ്ഥാപനം തുടങ്ങിയ ആദ്യ വനിതയെന്ന ചരിത്രവും അവർ കുറിച്ചു.
വർണവിവേചനത്തിനെതിരെ നിലകൊണ്ട രാഷ്ട്രീയത്തടവുകാർക്കും സാമൂഹിക പ്രവർത്തകർക്കും വേണ്ടി കോടതികളിൽ ശക്തമായി വാദിച്ചു. തടവുകാരുടെ മൗലികാവകാശങ്ങൾ സംരക്ഷിക്കുന്നതിനും ക്രൂരമായ പീഡനങ്ങൾക്കെതിരെയും അവർ നിരന്തരം ശബ്ദമുയർത്തി. 1995-ൽ ദക്ഷിണാഫ്രിക്കൻ ഹൈക്കോടതിയിൽ ആക്ടിങ് ജഡ്ജിയായി നിയമിതയാകുന്ന ആദ്യ കറുത്തവർഗക്കാരിയും നവനീതം പിള്ളയാണ്.
അതേ വർഷം തന്നെ റുവാണ്ടയ്ക്കായുള്ള യുഎന്നിന്റെ രാജ്യാന്തര ക്രിമിനൽ ട്രൈബ്യൂണൽ ജഡ്ജിയായും അവർ നിയോഗിക്കപ്പെട്ടു. തുടർന്ന് 1999 മുതൽ 2003 വരെ ആ ട്രൈബ്യൂണലിന്റെ അധ്യക്ഷയായും പ്രവർത്തിച്ചു. 2003-ൽ രാജ്യാന്തര ക്രിമിനൽ കോടതി ജഡ്ജിയായി ചുമതലയേറ്റു. 2008 സെപ്റ്റംബർ ഒന്നിന് യുഎൻ മനുഷ്യാവകാശ ഹൈക്കമ്മിഷണറായി ചുമതലയേറ്റ അവർ 2014 വരെ ആ പദവിയിൽ തിളക്കമാർന്ന സേവനം കാഴ്ചവച്ചു. സ്ത്രീകളുടെ അവകാശ സംരക്ഷണത്തിനായി പ്രവർത്തിക്കുന്ന ആഗോള സംഘടനയായ ‘ഇക്വാലിറ്റി നൗ’വിന്റെ സഹസ്ഥാപക കൂടിയാണ് നവനീതം പിള്ള.
Source link
