ബാങ്ക് സമരത്തിന് താൽക്കാലിക വിരാമം; മൂന്ന് ദിവസവും ബാങ്കുകൾ സാധാരണ നിലയിൽ പ്രവർത്തിക്കും

ന്യൂഡൽഹി: ഇന്ന് മുതൽ മൂന്ന് ദിവസങ്ങളിലായി നടത്താൻ നിശ്ചയിച്ചിരുന്ന രാജ്യവ്യാപക ബാങ്ക് പണിമുടക്ക് പിൻവലിച്ചു. വിവിധ ബാങ്ക് യൂണിയനുകളുടെ കൂട്ടായ്മയായ യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) ആണ് സമരം മാറ്റിവെച്ചതായി ഔദ്യോഗികമായി അറിയിച്ചത്. ഇന്ത്യൻ ബാങ്ക്സ് അസോസിയേഷനുമായി (ഐബിഎ) ഇന്നലെ രാത്രി നടത്തിയ നിർണായക ചർച്ചകൾക്കൊടുവിലാണ് പണിമുടക്കിൽ നിന്ന് പിന്മാറാൻ തീരുമാനിച്ചത്.

സെപ്റ്റംബർ 28 മുതൽ 30 വരെ മൂന്ന് ദിവസങ്ങളിലായി നടത്താനിരുന്ന പണിമുടക്കിലേക്കാണ് യുഎഫ്ബിയു ആഹ്വാനം ചെയ്തിരുന്നത്. നേരത്തെ നടന്ന സമരങ്ങളുടെ തുടർച്ചയെന്നോണം, ബാങ്കിംഗ് മേഖലയിലെ വിവിധ ആവശ്യങ്ങൾ ഉന്നയിച്ചായിരുന്നു സമരം സംഘടിപ്പിച്ചത്. ആഴ്ചയിൽ അഞ്ച് പ്രവൃത്തിദിനങ്ങൾ മാത്രമാക്കുക എന്നത് ഉൾപ്പെടെയുള്ള പ്രധാന ആവശ്യങ്ങളാണ് യൂണിയനുകൾ ഉന്നയിച്ചിരുന്നത്.