നവംബര്‍ 14ന് കോഴിക്കോട്ട് അരലക്ഷം പേര്‍ അണിനിരക്കുന്ന ‘വോട്ട് ബച്ചാവോ, ദേശ് ബച്ചാവോ’ മഹാറാലി
കോഴിക്കോട്∙ ഭരണഘടന സംരക്ഷിക്കാനും വോട്ടു ചോര്‍ച്ചയ്ക്കെതിരെ പ്രതിരോധം തീര്‍ക്കാനും ലക്ഷ്യമിട്ട് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നവംബര്‍ 14ന് കോഴിക്കോട് കടപ്പുറത്ത് വമ്പന്‍ മഹാറാലി നടത്തും. രാജ്യത്തിന്റെ പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ ജന്മദിനത്തില്‍ ‘വോട്ട് ബച്ചാവോ, ദേശ് ബച്ചാവോ’ (വോട്ട് സംരക്ഷിക്കൂ, രാജ്യത്തെ രക്ഷിക്കൂ) എന്ന പ്രമേയത്തിലാണ് കോണ്‍ഗ്രസ് ഈ പ്രക്ഷോഭം സംഘടിപ്പിക്കുന്നത്.
ചടങ്ങില്‍ അരലക്ഷത്തോളം പ്രവര്‍ത്തകര്‍ അണിനിരക്കുമെന്നാണ് സംഘാടകരുടെ വിലയിരുത്തല്‍. കോണ്‍ഗ്രസിന്റെ ദേശീയ, സംസ്ഥാന തലത്തിലുള്ള പ്രമുഖ നേതാക്കള്‍ അണിനിരക്കുന്ന മഹാറാലി എഐസിസി ജനറല്‍ സെക്രട്ടറി കെ.സി. വേണുഗോപാല്‍ എം.പി ഔദ്യോഗികമായി ഉദ്ഘാടനം ചെയ്യും. വിവിധ സാമൂഹിക, സാംസ്‌കാരിക, രാഷ്ട്രീയ രംഗങ്ങളിലെ പ്രമുഖ വ്യക്തികളും പരിപാടിയെ അഭിസംബോധന ചെയ്ത് സംസാരിക്കും.
റാലിയുടെ മുന്നൊരുക്കങ്ങളും സംഘാടനവും വിലയിരുത്തുന്നതിനായി കോഴിക്കോട് ഡിസിസി ഓഫീസില്‍ ചേര്‍ന്ന പ്രത്യേക യോഗത്തില്‍ ഡിസിസി പ്രസിഡന്റ് കെ. പ്രവീണ്‍കുമാര്‍ എംഎല്‍എ അധ്യക്ഷത വഹിച്ചു. യോഗത്തില്‍ അഡ്വ. കെ. ജയന്ത് എംഎല്‍എ, വി.ടി. സൂരജ് എംഎല്‍എ, അഡ്വ. പി.എം. നിയാസ്, മുന്‍ ഡിസിസി പ്രസിഡന്റ് കെ.സി. അബു, യുഡിഎഫ് ജില്ലാ ചെയര്‍മാന്‍ വി.ഡി. ജോസഫ്, ഡിസിസി ജനറല്‍ സെക്രട്ടറി പി.എം. അബ്ദുറഹ്മാന്‍, ചോലക്കല്‍ രാജേന്ദ്രന്‍ തുടങ്ങിയവര്‍ സംസാരിച്ചു.
Source link
