കൊച്ചി മിനി കൂപ്പർ അപകടം: രണ്ടുപേർ കൂടി അറസ്റ്റിൽ, സുഹൈൽ സജീവിന്റെ ലൈസൻസ് റദ്ദാക്കുന്നു

നെടുമ്പാശേരിയിൽ ദാരുണമായ അപകടത്തിന് കാരണമായ മിനി കൂപ്പർ വാഹനം

കൊച്ചി: വിവിധ ബാറുകളിൽ നിന്നും അമിത അളവിൽ മദ്യം കഴിച്ചതിനുശേഷം മിനി കൂപ്പർ കാർ അതിവേഗത്തിൽ ഓടിച്ച് മൂന്ന് പേരുടെ മരണത്തിന് ഇടയാക്കിയ കേസിൽ രണ്ട് പേർ കൂടി കസ്റ്റഡിയിലായി. വാഹനമോടിച്ച സുഹൈൽ സജീവ് (19) എന്നയാളുടെ സുഹൃത്തുക്കളായ ജോയൽ, അമീൻ എന്നിവരാണ് പൊലീസിന്റെ പിടിയിലായത്. സംഭവുമായി ബന്ധപ്പെട്ട് മറ്റൊരു കൂട്ടുകാരനായ ആലപ്പുഴ കൊമ്മാടി പാലപ്പറമ്പിൽവീട്ടിൽ നിനവ് (22) എന്നയാളെ കഴിഞ്ഞ ദിവസം തന്നെ സുഹൈലിനൊപ്പം അറസ്റ്റ് ചെയ്തിരുന്നു. ഇതോടെ ഈ കേസിലകപ്പെട്ടവരുടെ ആകെ എണ്ണം നാലായി ഉയർന്നു. പ്രതികൾക്കെതിരെ കുറ്റകൃത്യത്തിന് പ്രേരിപ്പിച്ച വകുപ്പുകൾ ചേർത്താണ് കേസെടുത്തിരിക്കുന്നത്. അളവിലധികം മദ്യം ഉപയോഗിച്ചതും, കാറിന്റെ ഭ്രാന്തമായ വേഗത തടയാൻ തയ്യാറാകാത്തതും ഇവർക്കതിരെ ചുമത്തിയിട്ടുള്ള കുറ്റങ്ങളാണ്.

അപകടം നടന്നയുടൻ തന്നെ അമീനും ജോയലും അവിടെയുണ്ടായിരുന്ന മറ്റൊരു വാഹനത്തിൽ കയറി രക്ഷപ്പെടുകയായിരുന്നു. എന്നാൽ മുൻവശത്തെ സീറ്റിലുണ്ടായിരുന്ന സുഹൈലിനെയും നിനവിനെയും സംഭവസ്ഥലത്തുനിന്ന് തന്നെ പൊലീസ് പിടികൂടി. മൂന്ന് വ്യത്യസ്ത ബാറുകളിൽ കയറി തുടർച്ചയായി മദ്യം കഴിച്ച ശേഷമായിരുന്നു ഇവരുടെ കാർയാത്ര. ഇതിനിടയിൽ, പ്രധാന പ്രതിയായ സുഹൈൽ സജീവിന്റെ ഡ്രൈവിംഗ് ലൈസൻസ് റദ്ദ് ചെയ്യുന്നതിനുള്ള നിയമപരമായ നടപടികൾ മോട്ടോർ വെഹിക്കിൾ ഡിപ്പാർട്ട്മെന്റ് ആരംഭിക്കുമെന്നാണ് ലഭിക്കുന്ന വിവരം. കഴിഞ്ഞ ദിവസം പുലർച്ചെ 1.40-ഓടെ നെടുമ്പാശേരി എയർപോർട്ടിന് സമീപമുള്ള സുവർണോദ്യാനം ബയോളജിക്കൽ പാർക്കിന് അരികിലായിരുന്നു ഈ ദുരന്തം സംഭവിച്ചത്.

അപകടം നടക്കുമ്പോൾ അതിവേഗത്തിൽ സഞ്ചരിച്ചിരുന്ന മിനി കൂപ്പർ കാർ സാങ്കേതിക പരിശോധനയ്ക്ക് വിധേയമാക്കും. അപകട സമയത്ത് വാഹനം എത്ര വേഗതയിലായിരുന്നു സഞ്ചരിച്ചിരുന്നത്, വാഹനത്തിന് എന്തെങ്കിലും യന്ത്രത്തകരാറുകൾ ഉണ്ടായിരുന്നുവോ തുടങ്ങിയ വിവിധ കാര്യങ്ങൾ നിർമ്മാതാക്കളായ ബി.എം.ഡബ്ല്യു കമ്പനിയുടെ വിദഗ്ധ ഉദ്യോഗസ്ഥരെത്തി പരിശോധിച്ച ശേഷം അധികാരികളെ അറിയിക്കും.

‘ഇഹ ഡിസൈൻസ്’ എന്ന വസ്ത്രനിർമ്മാണ സ്ഥാപനത്തിന്റെ ചെയർമാൻ സജീവിന്റെയും, കമ്പനിയുടെ മാനേജിംഗ് ഡയറക്ടറായ പുഞ്ചപ്പാടത്ത് നൂഹയുടെയും മകനാണ് സുഹൈൽ. കാക്കനാട് രാജഗിരി കോളേജിലെ ബി.കോം വിദ്യാർത്ഥിയാണ് ഇയാൾ. സ്‌കൂട്ടറിന് പിന്നിൽ അതിവേഗത്തിലെത്തിയ മിനി കൂപ്പർ കാർ ഇടിക്കുകയായിരുന്നു. അപകടത്തിൽ സ്കൂട്ടർ യാത്രികരായ മൂന്ന് പേരും റോഡിലേക്ക് തലയിടിച്ച് വീണ് സംഭവസ്ഥലത്ത് തന്നെ മരണമടഞ്ഞു. സ്കൂട്ടറുമായി ഏകദേശം നൂറു മീറ്ററോളം മുന്നോട്ടുപോയ കാർ കോൺക്രീറ്റ് ഭിത്തിയിൽ ഇടിച്ചാണ് നിന്നത്.

വയനാട് കൽപ്പറ്റ മടക്കിമല സന്തോഷ് ഭവനിൽ കല്യാണ മന്ദിരം എസ്റ്റേറ്റിലെ റൈറ്റർ സന്തോഷിന്റെ മകളായ ദേവിക (കുക്കു 21), പാലക്കാട് മണ്ണാർക്കാട് ഇടക്കൂർശ്ശി നെല്ലാറ്റ കരിമ്പ മുള്ളങ്കുഴി വീട്ടിൽ ഓട്ടോറിക്ഷ ഡ്രൈവറായ എം.ആർ.പ്രദീപ്കുമാറിന്റെ മകൾ ഗോപിക (22), കർണാടക കൂർഗ് കനകമഞ്ചൽ വീട്ടിൽ ഇബ്രാഹിമിന്റെ മകൻ ഇയ്യാസ് (21) എന്നിവരാണ് ജീവൻ നഷ്ടപ്പെട്ടത്.

മരണമടഞ്ഞ മൂന്ന് പേരും എറണാകുളത്ത് ലോജിസ്റ്റിക്സ് കോഴ്സിന് പഠിക്കുന്ന വിദ്യാർത്ഥികളാണ്. ഇതിനോടൊപ്പം തൃക്കാക്കര സുക്കോയോ പ്രീമിയം ക്രാഫ്റ്റ്‌ഷോപ്പിൽ അവർ പാർട്ട് ടൈം ജോലിയും ചെയ്തുവരികയായിരുന്നു. ജോലി സമയം കഴിഞ്ഞ് നെടുമ്പാശേരിയിലെ ഒരു ഹോട്ടലിൽ നിന്ന് ഭക്ഷണം കഴിച്ച ശേഷം തിരികെ മടങ്ങുന്നതിനിടയിലാണ് ഇവർ അപകടത്തിൽപ്പെട്ടത്.

                        English Summary

                            Two more people, Ameen and Joel, have been arrested in connection with the incident in which a 19-year-old, Suhail Sajeev, allegedly killed three people while driving a Mini Cooper after drinking heavily at three bars. The Motor Vehicles Department is reportedly preparing to take steps to cancel Suhail Sajeev’s driving licence.