അധ്യാപകരില്ലാത്ത സ്കൂളുകൾ; സഭയിൽ പൊട്ടിക്കരഞ്ഞ് ആം ആദ്മി പാർട്ടി എംഎൽഎയ്ക്ക് സസ്പെൻഷൻ

ഛണ്ഡിഗഡ് ∙ പാർട്ടി നിലപാടുകൾക്ക് എതിരായി പ്രവർത്തിച്ചെന്നും അച്ചടക്കം ലംഘിച്ചെന്നും കാണിച്ച് പഞ്ചാബിലെ മൗർ മണ്ഡലത്തിൽ നിന്നുള്ള എഎപി എംഎൽഎ സുഖ്‌വീർ സിങ് മൈസർഖാനയെ ആം ആദ്മി പാർട്ടി സസ്‌പെൻഡ് ചെയ്തു. സ്വന്തം മണ്ഡലത്തിലെ വിദ്യാലയങ്ങളിൽ അധ്യാപകരുടെ കുറവുള്ള കാര്യം പറഞ്ഞ് അദ്ദേഹം സമൂഹമാധ്യമങ്ങളിൽ വികാരാധീനനായി ഒരു വീഡിയോ പുറത്തുവിട്ടിരുന്നു. ഇതിന് പിന്നാലെയാണ് പാർട്ടിയുടെ ഭാഗത്തുനിന്ന് ഈ കടുത്ത നടപടിയുണ്ടായത്. സുഖ്‌വീർ സിങ്ങിന്റെ പ്രാഥമിക അംഗത്വം റദ്ദാക്കിയതായി എഎപിയുടെ ഔദ്യോഗിക കുറിപ്പിൽ വ്യക്തമാക്കുന്നു.

എങ്കിലും, എംഎൽഎ പങ്കുവെച്ച വീഡിയോയും ഈ സസ്‌പെൻഷനും തമ്മിൽ നേരിട്ട് ബന്ധമുണ്ടെന്ന് പാർട്ടി ഇതുവരെ തുറന്നുസമ്മതിച്ചിട്ടില്ല. പാർട്ടിയുടെ നയങ്ങൾക്ക് എതിരായ പ്രവർത്തനങ്ങളും അച്ചടക്കമില്ലായ്മയുമാണ് ഈ നടപടിക്ക് കാരണമെന്ന് മാത്രമാണ് ഔദ്യോഗിക വിശദീകരണത്തിലുള്ളത്.

അതേസമയം, എംഎൽഎയുടെ ഈ വീഡിയോ പങ്കുവെച്ചുകൊണ്ട് ബിജെപി നേതാവ് രവ്‌നീത് സിങ് ബിട്ടു പഞ്ചാബ് സർക്കാരിന്റെ വിദ്യാഭ്യാസ രംഗത്തെ അവകാശവാദങ്ങൾക്കെതിരെ കടുത്ത വിമർശനവുമായി എത്തി. സ്വന്തം സർക്കാരിലെ എംഎൽഎയ്ക്ക് തന്നെ സ്വന്തം മണ്ഡലത്തിലെ സ്കൂളുകളിലേക്ക് അധ്യാപകരെ കിട്ടാൻ സമൂഹമാധ്യമങ്ങളുടെ സഹായം തേടേണ്ടി വരുന്നു എന്നത് പഞ്ചാബിലെ വിദ്യാഭ്യാസ മേഖലയുടെ യഥാർഥ അവസ്ഥയാണ് കാട്ടിത്തരുന്നത് എന്ന് അദ്ദേഹം കുറ്റപ്പെടുത്തി. സർക്കാരിന്റെ പെരുപ്പിച്ചു കാണിച്ച വിദ്യാഭ്യാസ അവകാശവാദങ്ങളുടെയെല്ലാം പൊള്ളത്തരം സ്വന്തം എംഎൽഎയുടെ കണ്ണീരിലൂടെയാണ് പുറത്തുവന്നതെന്നും ബിട്ടു കൂട്ടിച്ചേർത്തു.