ഗാന്ധിയോടൊപ്പം ജിന്നയുടെ ചിത്രം എന്തിന്? വിവാദത്തിന് മറുപടിയുമായി ദിയ കൃഷ്ണ

ദിയ കൃഷ്ണ

തിരുവനന്തപുരം: കേരളത്തെ അവഹേളിക്കുന്ന തരത്തിൽ ഉത്തരേന്ത്യൻ ഇൻഫ്ലുവൻസർ പങ്കുവെച്ച വീഡിയോയിൽ നടത്തിയ പരാമർശത്തിൽ വിശദീകരണവുമായി ബിജെപി നേതാവ് കൃഷ്ണകുമാറിന്റെ മകൾ ദിയ കൃഷ്ണ രംഗത്ത്. ‘കാശി’ എന്ന കഫേയിലെ ചുവരുകളിൽ മഹാത്മാഗാന്ധിക്കൊപ്പം പാകിസ്ഥാൻ സ്ഥാപകൻ മുഹമ്മദാലി ജിന്നയുടെ ചിത്രം കൂടി പ്രദർശിപ്പിച്ചിരിക്കുന്നത് കണ്ടപ്പോഴാണ് താൻ ‘സാഡ് റിയാലിറ്റി’ (Sad Reality) എന്ന് കമന്റ് ചെയ്തതെന്ന് ദിയ വിശദീകരിക്കുന്നു.

വീഡിയോയുടെ പൂർണ്ണരൂപം കാണാതെ, ആദ്യ ഭാഗം മാത്രം കണ്ട് ധൃതിപിടിച്ച് പ്രതികരിച്ചത് തന്റെ ഭാഗത്തുനിന്നുണ്ടായ പിഴവാണെന്ന് ദിയ സമ്മതിക്കുന്നു. ഇതിന് താൻ നിരുപാധികം ക്ഷമ ചോദിക്കുന്നുവെന്നും അവർ വ്യക്തമാക്കി. തന്റെ കമന്റിനെ ചില മാധ്യമങ്ങളും സോഷ്യൽ മീഡിയ ഉള്ളടക്ക നിർമ്മാതാക്കളും വളച്ചൊടിച്ച്, താൻ മുസ്ലീം സമുദായത്തിനെതിരെ നിലപാടെടുത്തു എന്ന് വരുത്തിത്തീർക്കാൻ ശ്രമിച്ചുവെന്നും ദിയ തന്റെ സോഷ്യൽ മീഡിയ പേജിൽ പങ്കുവെച്ച വീഡിയോയിൽ കുറ്റപ്പെടുത്തി.

ഏതെങ്കിലും മതത്തെയോ വിഭാഗത്തെയോ വെറുക്കുന്ന ആളല്ല താനെന്ന് ദിയ ഊന്നിപ്പറയുന്നു. സ്വന്തം മതത്തെ സ്നേഹിക്കുന്ന ഒരു ഹിന്ദുവാണെങ്കിലും, എല്ലാ മതങ്ങളെയും ഒരുപോലെ ബഹുമാനിക്കുന്നുണ്ട്. തന്റെ കുടുംബത്തിലും സുഹൃദ്‌വലയത്തിലും മുസ്ലീം സമുദായത്തിൽപ്പെട്ട നിരവധി പേരുണ്ട്. യാത്രകളിലും മറ്റും തന്നോട് ഏറ്റവും കൂടുതൽ സ്നേഹം കാണിക്കുകയും സെൽഫികളെടുക്കാൻ എത്താറുള്ളതും മുസ്ലീം പെൺകുട്ടികളാണെന്നും അവർ ഓർമ്മിപ്പിക്കുന്നു.

വിഷയത്തിന്റെ നിജസ്ഥിതി മനസ്സിലാക്കാതെയാണ് തനിക്കെതിരെ വലിയ തോതിലുള്ള സൈബർ ആക്രമണങ്ങൾ നടക്കുന്നത്. നല്ല കാര്യങ്ങളോ സാമൂഹിക സേവനങ്ങളോ വാർത്തയാക്കാൻ മടിക്കുന്ന മാധ്യമങ്ങൾ, വിവാദപരമായ കാര്യങ്ങളെ ആഘോഷമാക്കുകയാണ്. ജിന്നയുടെ ചിത്രം കഫേയിൽ വെച്ചതിനെക്കുറിച്ച് സംസാരിക്കാൻ തയാറാകുന്നവർ, എന്തുകൊണ്ടാണ് അങ്ങനെയൊരു ചിത്രം അവിടെ വെച്ചത് എന്നതിന്റെ കാരണം കൂടി വ്യക്തമാക്കണമെന്നും ദിയ ആവശ്യപ്പെട്ടു. മാധ്യമങ്ങളിൽ വരുന്ന വാർത്തകൾ കണ്ണടച്ച് വിശ്വസിക്കരുതെന്നും, ‘സാഡ് റിയാലിറ്റി’ എന്ന തന്റെ പരാമർശം ജിന്നയുടെ ചിത്രം വെച്ചതിനെ മാത്രമാണ് ഉദ്ദേശിച്ചതെന്നും ദിയ വ്യക്തമാക്കി.

RELATED TOPICS: DIYA KRISHNA, GANDHI JINNAH CONTROVERSY, DIYA KRISHNA COMMENT, SAD REALITY COMMENT, SOCIAL MEDIA CONTROVERSY