മറയൂർ, കാന്തല്ലൂർ മലനിരകളിൽ ശക്തമായ മഴയും കനത്ത മൂടൽമഞ്ഞും തുടരുന്നു. കഴിഞ്ഞ കുറച്ചു ദിവസങ്ങളായി വിട്ടുവിട്ടു പെയ്തിരുന്ന മഴ ഞായറാഴ്ച രാവിലെ മുതൽ കൂടുതൽ കരുത്താർജിക്കുകയായിരുന്നു. തിങ്കളാഴ്ചയോടെ മഴയുടെ ശക്തിയിൽ നേരിയ കുറവുണ്ടായെങ്കിലും കാലാവസ്ഥാ മാറ്റം പ്രദേശത്ത് തുടരുകയാണ്.
മറയൂർ– കാന്തല്ലൂർ പാതയടക്കം ഈ മേഖലയിലെ പലയിടങ്ങളിലും രാപ്പകൽ ഭേദമന്യേ മൂടൽമഞ്ഞ് നിറഞ്ഞുനിൽക്കുന്ന സ്ഥിതിയാണുള്ളത്. കാഴ്ചാപരിധി ഗണ്യമായി കുറഞ്ഞതോടെ റോഡിലിറങ്ങുന്ന വാഹനങ്ങൾ ഹെഡ്‌ലൈറ്റുകൾ തെളിച്ചാണ് യാത്ര തുടരുന്നത്. മഴയും മഞ്ഞും കാരണം ഗതാഗതവും കാര്യമായി തടസ്സപ്പെടുന്നുണ്ട്.
