ഭർത്താവിന്റെ ഐടി ജോലി നഷ്ടപ്പെട്ടതിനെക്കുറിച്ചും ആ മാറ്റങ്ങളെക്കുറിച്ചും ദിയ പറഞ്ഞത് കേട്ടോ? അശ്വിനോടൊഴികെ മറ്റെല്ലാവരോടും ആ സത്യം തുറന്നുപറഞ്ഞ് ദിയ

അശ്വിൻ, ദിയ കൃഷ്‌ണ

നടൻ കൃഷ്‌ണ കുമാറിന്റെ മകളായ ദിയ കൃഷ്‌ണ സോഷ്യൽ മീഡിയയിലൂടെ ഏറെ ശ്രദ്ധ നേടിയ ഒരു ഡിജിറ്റൽ കണ്ടന്റ് ക്രിയേറ്ററാണ്. ‘ഓ ബൈ ഓസി’ എന്ന സംരംഭത്തിന്റെ അമരക്കാരിയായ ദിയ, തന്റെ വ്യക്തിപരമായ വിശേഷങ്ങൾക്കൊപ്പം സ്വന്തം ബിസിനസിന്റെ പ്രചാരണങ്ങളും സമൂഹമാധ്യമങ്ങളിൽ പങ്കുവെക്കാറുണ്ട്. എന്നാൽ ഇപ്പോൾ, തന്റെ ഭർത്താവ് അശ്വിൻ ഐടി ജോലി ഉപേക്ഷിച്ചുകൊണ്ട് തങ്ങളുടെ കമ്പനിയുടെ മുഖ്യ എക്സിക്യൂട്ടീവ് ഓഫീസർ (സിഇഒ) ആയി ചുമതലയേറ്റെടുത്ത വിവരം വെളിപ്പെടുത്തിയിരിക്കുകയാണ് ദിയ കൃഷ്‌ണ.

ഐടി മേഖലയിൽ അശ്വിൻ ചെയ്തിരുന്ന കഠിനാധ്വാനത്തിന് അർഹമായ പ്രതിഫലമോ അംഗീകാരമോ ലഭിച്ചിരുന്നില്ല എന്ന് ദിയ തുറന്നടിച്ചു. എന്നാൽ ‘ഓ ബൈ ഓസി’യിൽ നിന്നുള്ള ലാഭത്തിന്റെ ഒരു പങ്കാളിത്തം ഇപ്പോൾ അശ്വിനുണ്ട് എന്നും, അതുവഴി അദ്ദേഹത്തിന്റെ വരുമാനത്തിലും ജീവിതരീതിയിലും വലിയ പുരോഗതിയുണ്ടായെന്നും ദിയ വ്യക്തമാക്കി. സംരംഭം മികച്ച രീതിയിൽ മുന്നോട്ടുപോകുന്നതിന്റെ പൂർണ്ണ ക്രെഡിറ്റ് അശ്വിനാണ് അർഹിക്കുന്നതെന്നും അവർ കൂട്ടിച്ചേർത്തു. യൂട്യൂബിൽ ആരാധകരുടെ സംശയങ്ങൾക്ക് മറുപടി നൽകിക്കൊണ്ട് തയ്യാറാക്കിയ ഒരു വ്ലോഗിലാണ് ദിയ ഈ സുപ്രധാന വിവരങ്ങൾ പങ്കുവെച്ചത്.

കുഞ്ഞിനെയും ബിസിനസും എങ്ങനെയാണ് ഒരേസമയം സന്തുലിതമായി മുന്നോട്ടു കൊണ്ടുപോകുന്നത് എന്ന ആരാധകന്റെ ചോദ്യത്തിന് മറുപടി പറയുകയായിരുന്നു ദിയ. ‘കമ്പനിയിലെ ജോലി അശ്വിൻ ഒഴിവാക്കിയിട്ട് ഇപ്പോൾ ആറുമാസത്തോളമായി. അവൻ ആ തീരുമാനം എടുത്ത സമയത്ത് ഇരു വീട്ടുകാർക്കും വലിയ ആശങ്കകളുണ്ടായിരുന്നു. ഐടി ജോലിയിൽ അവന് ഒട്ടേറെ ബുദ്ധിമുട്ടുകളും നിയന്ത്രണങ്ങളും നേരിടേണ്ടി വന്നിരുന്നു. ചെയ്യുന്ന തൊഴിലിന് തക്കതായ ആദരവോ ശമ്പളമോ അവന് ലഭിച്ചിരുന്നില്ല. ആ ടീമിലെ എല്ലാ കാര്യങ്ങളും നോക്കിയിരുന്നത് അവനായിരുന്നു. മറ്റ് ജീവനക്കാർ രാത്രി 11 മണിക്ക് ജോലി അവസാനിപ്പിച്ചു പോകുമ്പോൾ അശ്വിൻ പുലർച്ചെ ഒരു മണിവരെ അവിടെ ഇരുന്ന് ജോലി ചെയ്യുമായിരുന്നു. എന്നാൽ അതിനുള്ള യാതൊരു അംഗീകാരവും അവന് ലഭിച്ചില്ല. ഒരേ വഴിയിൽ മാത്രം സഞ്ചരിക്കുന്നതുപോലെയായിരുന്നു ആ അവസ്ഥ. ശരിയായി ഒരു അവധി പോലും ചോദിച്ചുവാങ്ങാൻ കഴിയാത്ത ദയനീയ സ്ഥിതിയായിരുന്നു അവന്റേത്.’

‘ഇപ്പോൾ അശ്വിൻ നമ്മുടെ ‘ഓ ബൈ ഓസി’യുടെ സിഇഒ പദവിയിലേക്ക് എത്തിയിരിക്കുകയാണ്. ഞാൻ സ്വയം സംരംഭകയായതിനാൽ അതിന്റെ സ്ഥാപക ഞാൻ തന്നെയാണ്, എന്നാൽ അശ്വിൻ ആണ് സിഇഒ. ബിസിനസിന്റെ സകലകാര്യങ്ങളും ഇപ്പോൾ നിയന്ത്രിക്കുന്നത് അവനാണ്. ബിസിനസിന്റെ ലാഭവിഹിതത്തിന്റെ ഒരു ഭാഗം അവനും ലഭിക്കുന്നുണ്ട്. അതുകൊണ്ടുതന്നെ പണ്ടത്തേക്കാൾ മികച്ച വരുമാനവും ഉയർന്ന ജീവിതനിലവാരവും ഇപ്പോൾ അശ്വിനുണ്ട്. മാനസിക സമ്മർദ്ദങ്ങളും ടെൻഷനുകളും പൂർണ്ണമായി ഒഴിവാകുകയും ചെയ്തു. കാര്യങ്ങൾ ഇങ്ങനെയൊക്കെയാണെന്ന് മനസ്സിലാക്കിയതോടെ അശ്വിന്റെ വീട്ടുകാരും പൂർണ്ണ പിന്തുണയുമായി ഒപ്പമുണ്ട്. അശ്വിന്റെ സാന്നിധ്യം ഉള്ളതുകൊണ്ടാണ് ഈ ബിസിനസ് ഇത്രയും ഭംഗിയായി മുന്നോട്ടുപോകുന്നത്. ഞാൻ അത് നേരിട്ട് അവനോട് പറയാറില്ലെങ്കിലും മറ്റുള്ളവരോടെല്ലാം എപ്പോഴും തുറന്നുപറയാറുള്ള കാര്യമാണിത്. ഈ കമ്പനിയുടെ മുഖവും ബുദ്ധിയും ഞാനാണെങ്കിൽ, അതിന്റെ നട്ടെല്ല് അശ്വിനാണ്. മകൾ ഒമിയെയും ‘ഓ ബൈ ഓസി’യെയും ഒരുപോലെ വിജയകരമായി മുന്നോട്ടുനയിക്കുന്നതിന് ഞാൻ ഏറ്റവും കൂടുതൽ നന്ദി പറയേണ്ടത് അശ്വിനോടാണ്’- ദിയ പറഞ്ഞു.

                        English Summary

                            Diya Krishna reveals how her husband Ashwin’s life, income, and lifestyle improved after quitting his IT job to become the CEO of her business, O By Osi.