ലീയുടെ മരണം: ആത്മഹത്യാക്കുറിപ്പ് കേരളത്തിൽ തയാറാക്കി, വിജിലൻസ് അന്വേഷിച്ചില്ലെന്ന് കുടുംബത്തിന്റെ വെളിപ്പെടുത്തൽ
കോട്ടയം: പൊതുമരാമത്ത് വകുപ്പ് മുൻ സെക്രട്ടറിയും നിലവിലെ മുഖ്യ തിരഞ്ഞെടുപ്പ് കമ്മിഷണറുമായ ഗ്യാനേഷ് കുമാർ ഉൾപ്പെട്ട കേരള സ്റ്റേറ്റ് ട്രാൻസ്‌പോർട്ട് പ്രോജക്ട് (കെഎസ്ടിപി) അഴിമതിക്കേസിൽ വിജിലൻസ് പുതിയ അന്വേഷണത്തിന് ഒരുങ്ങുകയാണ്. 2007-2012 കാലയളവിൽ ഇതേ വിഷയത്തിൽ നടന്ന അന്വേഷണത്തിൽ വീഴ്ചകളൊന്നും സംഭവിച്ചിട്ടില്ലെന്നാണ് വിജിലൻസിന്റെ നിലപാട്. എന്നാൽ, കെഎസ്ടിപിയുടെ നിർമാണ പങ്കാളികളായിരുന്ന ‘പതി-ബെൽ’ കമ്പനിയുടെ മുൻ കരാറുകാരൻ സാജൻ വി.ഒ നൽകിയ പുതിയ വിവരങ്ങൾ കേസിൽ വഴിത്തിരിവായേക്കാം.
2007-ൽ വിജിലൻസ് സ്പെഷൽ ഇൻവെസ്റ്റിഗേഷൻ യൂണിറ്റ്-1 രജിസ്റ്റർ ചെയ്ത കേസിൽ എട്ട് വ്യത്യസ്ത പരാതികളാണ് അന്ന് പരിശോധിച്ചത്. പൊതുമരാമത്ത് ഉദ്യോഗസ്ഥർക്കെതിരെയുള്ള രണ്ട് കോടി രൂപയുടെ കൈക്കൂലി ആരോപണം ഉൾപ്പെടെയുള്ള ഈ വിഷയങ്ങൾ മുൻപ് പരിശോധിച്ചിട്ടുണ്ടെന്ന് ഒക്ടോബർ 29-ന് നിയമസഭയിൽ മന്ത്രി പി.കെ. ബഷീറും അറിയിച്ചിരുന്നു. എസ്റ്റിമേറ്റ് തുകയെക്കാൾ അധിക തുകയ്ക്ക് കരാർ നൽകിയത്, 787 കോടി രൂപയുടെ പദ്ധതിക്കായി 1,209 കോടി രൂപ അനുവദിച്ചത്, 244 കോടിയുടെ നിർമാണത്തിന് 343 കോടിയുടെ എസ്റ്റിമേറ്റ് നിശ്ചയിച്ചത്, സ്ഥലമേറ്റെടുക്കൽ ഇനത്തിൽ 187 കോടിക്ക് പകരം 323 കോടി ചെലവഴിച്ചത്, നാറ്റ്പാക്ക്-സെസ്സ് സ്ഥാപനങ്ങൾക്ക് 50 കോടി രൂപ കൺസൾട്ടൻസി ഫീസ് നൽകിയത്, കരാറിന് മുൻപേ മൊബിലൈസേഷൻ തുക നൽകിയത്, പരിശോധനകളില്ലാതെ ബില്ലുകൾ മാറിയത്, മോണിറ്ററിങ് കമ്മിറ്റിയുടെ വീഴ്ച എന്നിവയായിരുന്നു പ്രധാന പരാതികൾ. പദ്ധതിയിലൂടെ 84 കോടിയുടെ നഷ്ടമുണ്ടായെന്ന സിഎജി റിപ്പോർട്ടും അന്ന് അന്വേഷണപരിധിയിലുണ്ടായിരുന്നു.
നിയമോപദേശത്തിന്റെ അടിസ്ഥാനത്തിൽ സർക്കാർ പുതിയ അന്വേഷണത്തിന് ഉത്തരവിട്ടെങ്കിലും, പഴയ അന്വേഷണം കൃത്യമായിരുന്നുവെന്നാണ് എസ്ഐയു-1-ന്റെ വിലയിരുത്തൽ. എന്നാൽ, ഈ ആരോപണങ്ങളുമായി ബന്ധപ്പെട്ട് വിജിലൻസ് ഒരിക്കൽ പോലും തന്നെ സമീപിച്ചിട്ടില്ലെന്ന് സാജൻ ‘ഓൺമനോരമ’യോട് വെളിപ്പെടുത്തി. പദ്ധതിയിൽ പങ്കാളികളായിരുന്ന മറ്റാരെയും അന്വേഷണ സംഘം ബന്ധപ്പെട്ടിട്ടില്ലെന്നും അദ്ദേഹം പറഞ്ഞു.
ചടയമംഗലത്തെ പതി-ബെൽ ക്യാംപ് ഓഫിസിലെ പ്രവർത്തനങ്ങളെക്കുറിച്ചും സാജൻ വിശദീകരിച്ചു. കമ്പനിയുടെ വർക്ക് മാനേജരായ മലേഷ്യൻ പൗരൻ സുകുമാരനുമായാണ് കരാറുകൾ ഒപ്പിട്ടത്. ജോലിക്കാവശ്യമായ വാഹനങ്ങളും സാമഗ്രികളും എത്തിക്കുന്നതിന്റെ ഭാഗമായി സുകുമാരനുമായും ലീയുമായും നിരന്തരം ആശയവിനിമയം നടത്തിയിരുന്നു. പണം ലഭിക്കാൻ താമസമെടുത്തെന്ന് പരാതിപ്പെട്ടപ്പോൾ, കൈക്കൂലി നൽകാത്തതിനാലാണ് ഗ്യാനേഷ് കുമാർ ബില്ലുകൾ തടഞ്ഞുവെച്ചതെന്ന് ലീ തങ്ങളോട് പറഞ്ഞിരുന്നതായി സാജൻ ഓർക്കുന്നു. ലീയുടെ മരണത്തെക്കുറിച്ചോ ആരോപണങ്ങളെക്കുറിച്ചോ വിജിലൻസോ പൊലീസോ തന്നെയോ തന്റെ സഹപ്രവർത്തകരെയോ ഒരിക്കലും ചോദ്യം ചെയ്തിട്ടില്ല. ഈ വിഷയത്തിൽ മലേഷ്യൻ പൊലീസും അന്വേഷണം നടത്തിയിരുന്നില്ലെന്ന് അന്നത്തെ മുതിർന്ന ഇന്റലിജൻസ് ഉദ്യോഗസ്ഥരും വ്യക്തമാക്കി. ലീയുടെ ഡ്രൈവറായിരുന്ന ഷാജഹാനെ പോലും അന്വേഷണത്തിന്റെ ഭാഗമാക്കാൻ അധികൃതർ തയാറായില്ലെന്നും സുകുമാരൻ പിന്നീട് മലേഷ്യയിലേക്ക് തിരിച്ചുപോയെന്നും സാജൻ കൂട്ടിച്ചേർത്തു.
