ആലുവ ഉളിയന്നൂരിലെ പഴയ സാധനങ്ങൾ ശേഖരിക്കുന്ന കടയിൽ ഉണ്ടായ അഗ്നിശമന ഉപകരണ (ഫയർ എക്സ്റ്റിംഗ്യൂഷർ) പൊട്ടിത്തെറിയിൽ ഒരാൾക്ക് ദാരുണാന്ത്യം. തായിക്കാട്ടുകര എസ്.എൻ. പുരം കാട്ടിക്കുഴി വീട്ടിൽ ചന്ദ്രപ്പൻ (52) ആണ് അപകടത്തിൽ മരിച്ചത്. ഇദ്ദേഹം നാട്ടുകാർക്കിടയിൽ ചന്തു എന്ന പേരിലാണ് അറിയപ്പെട്ടിരുന്നത്.
ഇന്ന് ഉച്ചകഴിഞ്ഞാണ് സംഭവം നടന്നത്. കടയിലേക്ക് കൊണ്ടുവന്ന ഉപയോഗശൂന്യമായ അഗ്നിശമന ഉപകരണങ്ങൾ തുറന്നു പരിശോധിക്കുന്നതിനിടെയായിരുന്നു അപ്രതീക്ഷിത സ്ഫോടനം. തൊട്ടുമുൻപ് രണ്ടെണ്ണം സുരക്ഷിതമായി തുറന്നെങ്കിലും, മൂന്നാമത്തേത് തുറന്നയുടൻ പൊട്ടിത്തെറിക്കുകയായിരുന്നു. ഉടൻതന്നെ ഇദ്ദേഹത്തെ ആലുവ കാരോത്തുകുഴി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ഉണ്ണി, വത്സ, ഷീബ, ഷീജ എന്നിവരാണ് സഹോദരങ്ങൾ. മൃതദേഹം പോസ്റ്റ്‌മോർട്ടം നടപടികൾക്കായി കാരോത്തുകുഴി ആശുപത്രി മോർച്ചറിയിലേക്ക് മാറ്റിയിരിക്കുകയാണ്.
