അബ്‌കാരി കേസ്: ആന്റോ അഗസ്റ്റിന്റെ ഭാര്യാമാതാവിന് എക്‌സൈസ് നോട്ടീസ്; വീട്ടിലെത്തി നടപടി
ആന്റോ അഗസ്റ്റിൻ
കൽപ്പറ്റ: അബ്‌കാരി കേസ് അന്വേഷണത്തിന്റെ ഭാഗമായി റിപ്പോർട്ടർ ബ്രോഡ്‌കാസ്റ്റിംഗ് കമ്പനി എംഡി ആന്റോ അഗസ്റ്റിന്റെ ഭാര്യാവീട്ടിൽ എക്‌സൈസ് സംഘം പരിശോധന നടത്തി. വയനാട്ടിലെ നെൻമേനി കോളിയാടിയിലുള്ള വീട്ടിലാണ് ഉദ്യോഗസ്ഥർ എത്തിയത്. ആന്റോയുടെ ഭാര്യാമാതാവായ ലില്ലി ജോസ് ഇവിടെ എത്തിയിട്ടുണ്ടെന്ന വിവരത്തെ തുടർന്ന്, മൊഴിയെടുക്കുന്നതിനായി നോട്ടീസ് നൽകാനാണ് സംഘം എത്തിയത്. എന്നാൽ, ലില്ലി ജോസ് ഇപ്പോൾ വീട്ടിലുണ്ടോ എന്ന കാര്യത്തിൽ സ്ഥിരീകരണമില്ല.
നേരത്തെ, ലില്ലി ജോസ് സമർപ്പിച്ച മുൻകൂർ ജാമ്യാപേക്ഷ കൽപ്പറ്റ സെഷൻസ് കോടതി തള്ളിക്കളഞ്ഞിരുന്നു. തന്നോട് ചോദ്യം ചെയ്യലിന് ഹാജരാകാൻ എക്‌സൈസ് വകുപ്പ് നോട്ടീസ് നൽകാൻ സാധ്യതയുണ്ടെന്ന് മനസ്സിലാക്കിയാണ് അവർ ജാമ്യത്തിനായി കോടതിയെ സമീപിച്ചത്. കേസിൽ പ്രതിയാക്കുകയാണെങ്കിൽ, മുൻകൂട്ടി നോട്ടീസ് നൽകിയ ശേഷം മാത്രമേ അറസ്റ്റ് ഉൾപ്പെടെയുള്ള തുടർനടപടികൾ പാടുള്ളൂ എന്ന പ്രതിഭാഗത്തിന്റെ ആവശ്യം കോടതി അംഗീകരിച്ചിട്ടുണ്ട്.
വാഴവറ്റയിലുള്ള ആന്റോ അഗസ്റ്റിന്റെ തറവാട്ടു വീട്ടിൽ നടത്തിയ പരിശോധനയിൽ അനുവദനീയമായതിലും അധികം മദ്യം കണ്ടെത്തിയ സംഭവത്തിൽ ഇദ്ദേഹം നേരത്തെ അറസ്റ്റിലാവുകയും പിന്നീട് ജാമ്യത്തിൽ പുറത്തിറങ്ങുകയും ചെയ്തിരുന്നു. നിയമപ്രകാരം ഒരാൾക്ക് വീട്ടിൽ സൂക്ഷിക്കാവുന്നതിന്റെ പരിധി ലംഘിച്ചുകൊണ്ട് 43 ലിറ്റർ വിദേശമദ്യവും വ്യാജമദ്യവുമാണ് ഇവിടെ നിന്ന് പിടിച്ചെടുത്തത്.
ഈ തറവാട്ടു വീടിന്റെ ഉടമസ്ഥാവകാശം തന്റെ ഭാര്യാമാതാവിനാണെന്നായിരുന്നു സുൽത്താൻ ബത്തേരി കോടതിയിൽ ആന്റോ അഗസ്റ്റിൻ വാദിച്ചത്. ജപ്‌തിയിലായ വീട് ലേലത്തിലൂടെ വാങ്ങിയത് ലില്ലി ജോസ് ആണെന്നും കോടതി അറ്റാച്ച്‌മെന്റ് നടപടികൾ നടക്കുന്നതിനാൽ തനിക്കെതിരെ കേസെടുക്കാൻ നിയമമില്ലെന്നും ആന്റോ വാദിച്ചിരുന്നു. താൻ മദ്യപിക്കാറില്ലെന്നും സർഫാസി നിയമപ്രകാരം നടപടികൾ നടക്കുന്ന സ്വത്താണതെന്നും അദ്ദേഹം ചൂണ്ടിക്കാട്ടിയിരുന്നു.
എന്നാൽ, ഈ വീട് ആന്റോയുടെ ഉടമസ്ഥതയിലുള്ളത് തന്നെയാണെന്നാണ് അന്വേഷണ സംഘത്തിന്റെ കണ്ടെത്തൽ. ആന്റോ അഗസ്റ്റിനാണ് വീടിന്റെ യഥാർത്ഥ ഉടമയെന്ന് തെളിയിക്കുന്നതിനായി വോട്ടർ പട്ടികയിലെ വിവരങ്ങൾ, കെഎസ്ഇബി ബില്ലുകൾ, വില്ലേജ് രേഖകൾ തുടങ്ങിയവ അന്വേഷണ ഉദ്യോഗസ്ഥർ കോടതിയിൽ ഹാജരാക്കിയിരുന്നു.
Source link
