കെഎഫ്സി വായ്പാ തട്ടിപ്പ്: പി.വി. അൻവറിന് ഹൈക്കോടതിയിൽ വീണ്ടും തിരിച്ചടി, ഹർജി തള്ളി

പി.വി. അൻവർ

തിരുവനന്തപുരം: കെ.എഫ്.സി. വായ്പാ തിരിമറി കേസിൽ മുൻ എം.എൽ.എ.യായ പി.വി. അൻവറിന് വലിയ തിരിച്ചടിയാണുണ്ടായിരിക്കുന്നത്. തനിക്കെതിരെയുള്ള വിജിലൻസ് അന്വേഷണം ഒഴിവാക്കണമെന്നാവശ്യപ്പെട്ട് നൽകിയ ഹർജി കേരള ഹൈക്കോടതി ഒരിക്കൽക്കൂടി തള്ളിക്കളഞ്ഞു. ചട്ടങ്ങൾ ലംഘിച്ച്, ഒരേ വസ്തു തന്നെ ഈടായി നൽകി 2015-ൽ കേരള ഫിനാൻഷ്യൽ കോർപ്പറേഷനിൽ നിന്നും വിവിധ വായ്പകൾ നേടിയെടുത്തു എന്നതാണ് പി.വി. അൻവറിനെതിരെയുള്ള പ്രധാന കുറ്റം.

മലങ്കുളം കൺസ്ട്രക്‌ഷൻസ്, പി.വി.ആർ. ഡെവലപ്പേഴ്‌സ് എന്നീ കമ്പനികളുടെയും അൻവറിന്റെ ഡ്രൈവറായ സിയാദിന്റെയും പേരിൽ എടുത്ത വായ്പകൾ തിരിച്ചടയ്ക്കാത്തതുമൂലം പലിശ സഹിതം കെ.എഫ്.സി.ക്ക് 22 കോടി രൂപയിലധികം നഷ്ടം വന്നതായി വിജിലൻസ് അന്വേഷണത്തിൽ വ്യക്തമായിരുന്നു. കള്ളപ്പണം വെളുപ്പിക്കൽ തടയൽ നിയമപ്രകാരമുള്ള കുറ്റങ്ങൾ ചുമത്തി എൻഫോഴ്സ്മെന്റ് ഡയറക്ടറേറ്റും (ഇ.ഡി) കേസ് രജിസ്റ്റർ ചെയ്തിരുന്നു. ഇതിന്റെ ഭാഗമായി അദ്ദേഹത്തിന്റെ വസതികളിലും സ്ഥാപനങ്ങളിലും പരിശോധനകളും നടന്നിരുന്നു. ഈ കേസുകൾ റദ്ദാക്കണമെന്ന് ആവശ്യപ്പെട്ടാണ് അൻവർ കോടതിയെ സമീപിച്ചത്. തനിക്കെതിരെ ഉയർന്നു വന്ന ആരോപണങ്ങൾ അടിസ്ഥാനരഹിതമാണെന്ന നിലപാടാണ് അദ്ദേഹം സ്വീകരിച്ചിരുന്നത്.

ഈ കേസിലെ നിർണായക തെളിവുകൾ പരാതിക്കാരനായ മുരുകേഷ് കോടതിയിൽ സമർപ്പിച്ചു. ഇതിനു പിന്നാലെ, ഹൈക്കോടതിയിൽ നൽകിയ ഹർജി പിൻവലിക്കാൻ അൻവർ സ്വയം തയ്യാറാവുകയായിരുന്നു. തുടർന്ന് കോടതി ഹർജി തള്ളുകയാണുണ്ടായത്. കഴിഞ്ഞ മാർച്ച് മാസത്തിലും സമാനമായ രീതിയിൽ അദ്ദേഹത്തിന്റെ ഹർജി ഹൈക്കോടതി തള്ളിയിരുന്നു.

                        English Summary

                            Former MLA P V Anvar suffered another setback in the KFC loan fraud case after the Kerala High Court dismissed his plea seeking to quash the vigilance case. He was accused of obtaining loans in 2015 by showing the same property as collateral without following norms. Vigilance alleged KFC suffered losses exceeding ₹22 crore, including interest, due to unpaid loans.                            
                    RELATED TOPICS: P V ANVAR, KFC LOAN FRAUD CASE, KERALA HIGH COURT, P V ANWAR CASE, KFC LOAN CASE