തിരുവനന്തപുരം∙ തിരുവനന്തപുരം കോർപറേഷൻ കൗൺസിലർ സ്ഥാനത്തുനിന്ന് ആർ. ശ്രീലേഖ രാജി വച്ചേക്കുമെന്ന അഭ്യൂഹങ്ങൾക്ക് വിരാമമാകുന്നു. രാജി പ്രഖ്യാപനം ഒത്തുതീർപ്പിലേക്ക് നീങ്ങുന്നതായാണ് ഒടുവിലത്തെ സൂചനകൾ. ബിജെപി നേതൃത്വം ഇടപെട്ട് നടത്തിയ അനുനയ നീചശങ്ങൾ വിജയം കണ്ടതായാണ് വിവരം. ഇതിന്റെ ഭാഗമായി ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ അടക്കമുള്ള പ്രമുഖ നേതാക്കൾ ശ്രീലേഖയുമായി ചർച്ച നടത്തിയിരുന്നു.
കോർപറേഷന്റെ പ്രവർത്തനങ്ങളുമായി ബന്ധപ്പെട്ട ചില തർക്കങ്ങളാണ് ശ്രീലേഖയെ പെട്ടെന്ന് ഇത്തരമൊരു കടുത്ത തീരുമാനത്തിലേക്ക് നയിച്ചത്. എന്നാൽ, നേതൃത്വവുമായി നടത്തിയ ചർച്ചയിൽ കാര്യങ്ങൾ അനുകൂലമായി ബോധ്യപ്പെടുത്താൻ കഴിഞ്ഞെന്നാണ് ബിജെപി വൃത്തങ്ങൾ നൽകുന്ന സൂചന. ഇതിന്റെ തുടർച്ചയെന്നോണം, രാജി തീരുമാനം അറിയിച്ച് വാട്സാപ് ഗ്രൂപ്പിൽ അവർ പങ്കുവച്ചിരുന്ന സന്ദേശം ശ്രീലേഖ പിൻവലിക്കുകയും (ഡിലീറ്റ് ചെയ്യുകയും) ചെയ്തു.
നേരത്തെ, ബിജെപി നേതൃത്വവുമായി ശ്രീലേഖയ്ക്ക് വിവിധ വിഷയങ്ങളിൽ അഭിപ്രായവ്യത്യാസങ്ങൾ ഉണ്ടായിരുന്നുവെന്ന് റിപ്പോർട്ടുകൾ പുറത്തുവന്നിരുന്നു. കോർപറേഷൻ തിരഞ്ഞെടുപ്പിന് ശേഷം മേയർ പദവി നൽകാത്തതിൽ അവർക്ക് കടുത്ത അതൃപ്തിയുണ്ടായിരുന്നു. തിരഞ്ഞെടുപ്പ് പ്രചാരണ ഘട്ടത്തിൽ ബിജെപി ശ്രീലേഖയുടെ മുഖം മുൻനിർത്തി വോട്ട് തേടിയെങ്കിലും, വിജയത്തിന് ശേഷം അവരെ ഒഴിവാക്കി വി.വി. രാജേഷിനെ മേയറായി തിരഞ്ഞെടുക്കുകയായിരുന്നു. കൂടാതെ, നിയമസഭാ തിരഞ്ഞെടുപ്പിൽ വട്ടിയൂർക്കാവിൽ ബിജെപി സ്ഥാനാർഥിയായി മത്സരിച്ചെങ്കിലും അവർക്ക് മൂന്നാം സ്ഥാനത്തേക്ക് പിന്തള്ളപ്പെടേണ്ടി വന്നിരുന്നു. പ്രതീക്ഷിച്ച വോട്ടുകൾ ശ്രീലേഖയ്ക്ക് ലഭിച്ചില്ലെന്ന തരത്തിലുള്ള ആക്ഷേപങ്ങളും അന്ന് പാർട്ടിക്ക് ഉള്ളിൽത്തന്നെ ഉയർന്നിരുന്നു.
Source link
