ഗവർണറുടെ റിപ്പോർട്ടിൽ അക്കമിട്ട് ക്രമക്കേടുകൾ: സ്ഥലംമാറ്റം അറിഞ്ഞ് മൂന്നാം ദിനം നിർണ്ണായക തീരുമാനവുമായി ആർലേക്കർ
തിരുവനന്തപുരം ∙ കേരള രാഷ്ട്രീയത്തെ പിടിച്ചുലയ്ക്കാൻ പോന്ന അതീവ നിർണ്ണായകമായ ഒരു തീരുമാനം കൈക്കൊണ്ട ശേഷമാണ് രാജേന്ദ്ര ആർലേക്കർ ഔദ്യോഗിക വസതിയിൽ നിന്ന് വിടവാങ്ങിയത്. രാഷ്ട്രപതിയുടെ സ്ഥലംമാറ്റ ഉത്തരവ് പുറത്തുവന്ന് മൂന്നാം നാൾ അദ്ദേഹം എടുത്ത ഈ സുപ്രധാന തീരുമാനം, ഗവർണർ ചുമതലയിൽ നിന്ന് പടിയിറങ്ങുന്നതുവരെ പുറംലോകം അറിഞ്ഞിരുന്നില്ല.
കഴിഞ്ഞ ജനുവരിയിൽ തലസ്ഥാനത്ത് പിഎസ്‌സി സംഘടിപ്പിച്ച ദേശീയ സെമിനാറിൽ മുഖ്യാതിഥിയായി പങ്കെടുത്ത ഗവർണർ, കമ്മീഷന്റെ പ്രവർത്തനങ്ങളെ അന്ന് വാനോളം പ്രശംസിച്ചിരുന്നു. എന്നാൽ, തൊട്ടുപിന്നാലെ പിഎസ്‌സിയുടെ വിശ്വാസ്യതയെ തന്നെ ബാധിക്കുന്ന തരത്തിലുള്ള വിവാദങ്ങൾ ഉയർന്നുവന്നത് അദ്ദേഹത്തെ ചിന്തിപ്പിച്ചു. ഈ വിഷയത്തിൽ നേരിട്ട് ഇടപെട്ട് കാര്യങ്ങൾ മനസ്സിലാക്കാൻ അദ്ദേഹം തീരുമാനിക്കുകയായിരുന്നു. പിഎസ്‌സി ചെയർമാനെ നേരിട്ട് വിളിച്ച് വിശദീകരണം തേടിയെങ്കിലും, ലഭിച്ച മറുപടികളിൽ ഗവർണർ തൃപ്തനായില്ല. തുടർന്ന് പിഎസ്‌സി സെക്രട്ടറിയെയും വിളിച്ചുവരുത്തുകയും ആഭ്യന്തര വിജിലൻസ് വിഭാഗം തയ്യാറാക്കിയ അന്വേഷണ റിപ്പോർട്ട് കർശനമായി പരിശോധിക്കുകയും ചെയ്തു.
ഈ സമയത്താണ് പിഎസ്‌സിക്കെതിരെ വിവിധ സംഘടനകളിൽ നിന്ന് പരാതികൾ ഗവർണറുടെ ഓഫീസിലെത്തിയത്. അഴിമതിയും ക്രമക്കേടുകളും നടന്നതായി ബോധ്യപ്പെട്ട സാഹചര്യത്തിൽ, യുവമോർച്ച നൽകിയ പരാതി പ്രത്യേകമായി പരിഗണിക്കാൻ അദ്ദേഹം തീരുമാനിച്ചു. നടപടികളിലേക്ക് കടക്കാൻ പാകത്തിൽ നിയമപരമായ കൃത്യതയോടെയാണ് യുവമോർച്ച ഈ പരാതി തയ്യാറാക്കിയത്. സംസ്ഥാന ബിജെപി നേതൃത്വത്തിന്റെ പിന്തുണയോടെ മുതിർന്ന അഭിഭാഷകരുടെ സഹായത്തോടെയാണ് ഇത് തയ്യാറാക്കിയത് എന്നതും ശ്രദ്ധേയമാണ്. നിലവിലെ വിവാദങ്ങൾക്കപ്പുറം, കഴിഞ്ഞ അഞ്ച് വർഷത്തിനിടെ പിഎസ്‌സിക്കെതിരെ ഉയർന്നുവന്ന എല്ലാ ആരോപണങ്ങളും ഈ പരാതിയിൽ അക്കമിട്ട് നിരത്തിയിരുന്നു. ഇവയെല്ലാം ഗവർണർ തന്റെ റിപ്പോർട്ടിൽ ഉൾപ്പെടുത്തുകയും ചെയ്തു. പിഎസ്‌സി വിഷയത്തിൽ പ്രത്യേക അന്വേഷണ സംഘത്തെ (SIT) നിയോഗിക്കാൻ സർക്കാർ നിർബന്ധിതമായ സാഹചര്യം കൂടി തന്റെ കണ്ടെത്തലുകളെ സാധൂകരിക്കാൻ ഗവർണർ ചൂണ്ടിക്കാട്ടുന്നു.
അർജന്റീന ഫുട്ബോൾ ടീം ഡീലുമായി ബന്ധപ്പെട്ട കേസിൽ മുൻ മന്ത്രി വി. അബ്ദുറഹ്മാനെതിരെ അന്വേഷണത്തിന് അനുമതി തേടിയുള്ള ഫയലും, മാണി സി. കാപ്പന്റെ എംഎൽഎ സ്ഥാനം റദ്ദാക്കണമെന്നാവശ്യപ്പെട്ടുള്ള പരാതിയും ഉൾപ്പെടെയുള്ള ഫയലുകൾ പുതിയ ഗവർണർക്ക് കൈമാറിയ വേളയിലാണ്, പിഎസ്‌സി വിഷയത്തിൽ ആർലേക്കർ സ്വതന്ത്രമായി അന്തിമ തീരുമാനമെടുത്തത്. ഗവർണർ മാറിയെങ്കിലും, അദ്ദേഹം സ്വീകരിച്ച ഈ നടപടികൾക്ക് യാതൊരു തടസ്സവും ഉണ്ടാകില്ല.
