മൂന്നാർ: മീശപ്പുലിമലയിൽ നീലക്കുറിഞ്ഞി വസന്തം കാണാനെത്തുന്നവർക്കായി പ്രത്യേക യാത്രാസൗകര്യമൊരുക്കി കേരള ഫോറസ്റ്റ് ഡെവലപ്‌മെന്റ് കോർപറേഷൻ (കെഎഫ്ഡിസി). ഇന്നലെ മുതലാണ് ഇതിനായുള്ള ക്രമീകരണങ്ങൾ ആരംഭിച്ചത്. മൂന്നാർ സൈലന്റ് വാലി റോഡിലെ കെഎഫ്ഡിസി ഓഫിസ് പരിസരത്തുനിന്നും പ്രത്യേക ജീപ്പുകളിലാണ് വിനോദസഞ്ചാരികളെ 30 കിലോമീറ്റർ അകലെയുള്ള റോഡോ മാൻഷൻ വരെ എത്തിക്കുന്നത്.
കൂടാതെ, മാട്ടുപ്പെട്ടിയിലെ മനോഹരമായ പുൽമേടുകളിലേക്ക് സഞ്ചാരികൾക്ക് പ്രവേശനം അനുവദിച്ച് ലൈവ് സ്റ്റോക്ക് ഡെവലപ്‌മെന്റ് ബോർഡ് നടപടി സ്വീകരിച്ചു. മൂന്നാർ-വട്ടവട പാതയിൽ മാട്ടുപ്പെട്ടി ഡാമിന്റെ വൃഷ്ടിപ്രദേശത്തുള്ള ഈ പുൽമേടുകൾ വിനോദസഞ്ചാരികളെ ഏറെ ആകർഷിക്കുന്ന ഇടമാണ്. നിലവിൽ 14 മുതൽ 16 വരെയുള്ള ഫീൽഡുകളിൽ, 15-ാം നമ്പർ പുൽമേടാണ് സന്ദർശകർക്കായി തുറന്നുകൊടുത്തിരിക്കുന്നത്. കേരള ലൈവ് സ്റ്റോക്ക് ഡെവലപ്‌മെന്റ് ബോർഡിന്റെ നിയന്ത്രണത്തിലുള്ളതാണ് ഈ പ്രദേശം.
ഈ പ്രദേശത്തെ പുൽമേടുകളിൽ കാട്ടാനകൾ കൂട്ടമായെത്തുന്നത് വിനോദസഞ്ചാരികൾക്ക് കൗതുകകരമായ കാഴ്ചയാണ്. ആനകളുടെ സ്വാഭാവിക ജീവിതത്തിന് തടസ്സമുണ്ടാകാത്ത രീതിയിലാണ് സന്ദർശന ക്രമീകരണങ്ങൾ ഒരുക്കിയിട്ടുള്ളത്. ആനകളുടെ സാന്നിധ്യം ശ്രദ്ധയിൽപ്പെട്ടാൽ ഉടൻ തന്നെ സന്ദർശകരെ സുരക്ഷിതമായി പുൽമേട്ടിൽ നിന്നും മാറ്റുന്നതിനായി പ്രത്യേക സുരക്ഷാ ഉദ്യോഗസ്ഥരെയും നിയോഗിച്ചിട്ടുണ്ട്. മുതിർന്നവർക്ക് 50 രൂപയും 12 വയസ്സിൽ താഴെയുള്ള കുട്ടികൾക്ക് 25 രൂപയുമാണ് പ്രവേശന ഫീസ്. രാവിലെ 8 മുതൽ വൈകിട്ട് 5.30 വരെയാണ് സന്ദർശന സമയം.
പുൽമേടുകളുടെ പരിപാലനത്തിനായി ബോർഡ് വലിയൊരു തുക ചെലവഴിക്കുന്നുണ്ട്. സർക്കാരിന്റെ നിർദേശപ്രകാരമാണ് വരുമാനം വർധിപ്പിക്കുന്നതിനായി പുൽമേടുകൾ സഞ്ചാരികൾക്കായി തുറന്നുകൊടുത്തതെന്ന് അധികൃതർ വ്യക്തമാക്കി. കൂടാതെ, കൂടുതൽ വരുമാനം ലക്ഷ്യമിട്ട് മാട്ടുപ്പെട്ടിയിൽ പെട്രോൾ പമ്പ് ആരംഭിക്കുന്നതിന് സർക്കാരിന്റെ അനുമതി തേടി അപേക്ഷ നൽകിയിട്ടുണ്ടെന്നും ബോർഡ് അറിയിച്ചു.
