സംഗീതമായിരുന്നു ജീവൻ; ഭക്ഷ്യക്കിറ്റ് വാങ്ങാൻ പോയി മടങ്ങാ യാത്രയായി ജോബിനയുടെ വേർപാട്

ഏറ്റുമാനൂർ ∙ സംഗീതം നിറഞ്ഞതായിരുന്നു ജോബിനയുടെ ലോകം. വേദഗിരി സെന്റ് മേരീസ് പള്ളിയുടെ ഗായകസംഘത്തിൽ സജീവമായിരുന്ന അവൾ, പാട്ടുകൾ പാടി അതിന്റെ ചെറിയ വിഡിയോകൾ സമൂഹമാധ്യമങ്ങളിൽ പങ്കുവെക്കാറുണ്ടായിരുന്നു. ആ പ്രിയഗായികയുടെ അപ്രതീക്ഷിത വേർപാട് നാടിനാകെ വലിയ നൊമ്പരമായിരിക്കുകയാണ്. കോട്ടയത്തെ പ്രമുഖ സ്വകാര്യ ആശുപത്രികളിൽ നഴ്സായി സേവനം അനുഷ്ഠിച്ചിരുന്ന ജോബിന, ഒന്നര വർഷം മുൻപാണ് ജോലിക്കായി സൗദി അറേബ്യയിലേക്ക്]}, പോയത്. ഒടുവിൽ നാട്ടിലെത്തിയ അവൾ ഒന്നര മാസത്തെ അവധിക്ക് ശേഷമാണ് കഴിഞ്ഞ മെയ് മാസത്തിൽ തിരികെ മടങ്ങിയത്. എന്നാൽ, കഴിഞ്ഞ ദിവസങ്ങളിൽ പോലും തന്റെ പാട്ടുകളും വാട്ട്സാപ്പ് സ്റ്റേറ്റസുകളുമെല്ലാം അവൾ സോഷ്യൽ മീഡിയയിൽ സജീവമായി പങ്കുവെച്ചിരുന്നു.

വെള്ളിയാഴ്ച രാത്രി പതിനൊന്നണിയോടെയാണ് ഈ ദുർവാർത്ത കുടുംബാംഗങ്ങൾ അറിയുന്നത്. സൗദിയിൽ നിന്നും അവധിക്ക് നാട്ടിലെത്തിയ കുമാരനല്ലൂർ സ്വദേശിനിയാണ് അപകടവിവരം ജോബിനയുടെ വീട്ടിലേക്ക് വിളിച്ച് അറിയിച്ചത്. അയർക്കുന്നം കോയിത്തുരുത്തിൽ കുടുംബാംഗമായ ബീന ജോണിയാണ് ജോബിനയുടെ മാതാവ്; ഇവർ കാണക്കാരി പഞ്ചായത്ത് പതിനാലാം വാർഡിലെ ആശാവർക്കറാണ്. കാണക്കാരിയിലെ ഒരു സ്വകാര്യ മെഡിക്കൽ സ്റ്റോറിലെ ഫാർമസിസ്റ്റായ ജോഷ്വയാണ് ജോബിനയുടെ ഏക സഹോദരൻ.