മാസപ്പടി കേസ്: പിണറായി വിജയന് ആശ്വാസം, വിജിലൻസ് അന്വേഷണത്തിന് ഹൈക്കോടതിയുടെ സ്റ്റേ

കൊച്ചി: മാസപ്പടി വിവാദത്തിൽ മുഖ്യമന്ത്രി പിണറായി വിജയന് വലിയ ആശ്വാസം. മുഖ്യമന്ത്രി പിണറായി വിജയനെതിരെ കൈക്കൂലിക്കേസും, മുൻ മന്ത്രി മുഹമ്മദ് റിയാസിനെതിരെ ഹവാല ഇടപാട് കേസും രജിസ്റ്റർ ചെയ്യണമെന്ന സിംഗിൾ ബെഞ്ചിന്റെ നിർദ്ദേശപ്രകാരമുള്ള തുടർനടപടികൾ ഹൈക്കോടതി ഡിവിഷൻ ബെഞ്ച് സ്റ്റേ ചെയ്തു.

സിംഗിൾ ബെഞ്ച് ഉത്തരവിനെ ചോദ്യം ചെയ്തുകൊണ്ട് പിണറായി വിജയൻ നൽകിയ അപ്പീൽ ഡിവിഷൻ ബെഞ്ച് ഫയലിൽ സ്വീകരിച്ചു. ജസ്റ്റിസ് ടി. നടരാജൻ, ജസ്റ്റിസ് ജോൺസൺ ജോൺ എന്നിവരടങ്ങുന്ന ഡിവിഷൻ ബെഞ്ചിന്റേതാണ് ഈ സുപ്രധാന ഉത്തരവ്. സിഎംആർഎൽ-എക്‌സാലോജിക് കേസിൽ പിണറായി വിജയൻ, മകൾ വീണ, മരുമകൻ കൂടിയായ എംഎൽഎ മുഹമ്മദ് റിയാസ് എന്നിവർക്കെതിരെ വിജിലൻസ് അന്വേഷണം നടത്തണമെന്ന സിംഗിൾ ബെഞ്ച് വിധിയാണ് ഇപ്പോൾ സ്റ്റേ ചെയ്യപ്പെട്ടത്.

നേരത്തെ, സിംഗിൾ ബെഞ്ച് ഉത്തരവിനെതിരെ അപ്പീൽ നൽകാനുള്ള അനുമതി തേടിയുള്ള ഹർജികൾ ഹൈക്കോടതിയിലെ മറ്റൊരു ഡിവിഷൻ ബെഞ്ച് തള്ളിയിരുന്നു. ഇതേത്തുടർന്ന് പിണറായി വിജയൻ ഉൾപ്പെടെയുള്ളവർ സുപ്രീം കോടതിയെ സമീപിക്കുകയായിരുന്നു. ഹൈക്കോടതി ഡിവിഷൻ ബെഞ്ച് അപ്പീലുകളിൽ വിശദമായ വാദം കേൾക്കണമെന്നായിരുന്നു സുപ്രീം കോടതിയുടെ നിർദ്ദേശം. ഇതിന്റെ അടിസ്ഥാനത്തിലാണ് ഹൈക്കോടതി ഇപ്പോൾ അപ്പീൽ പരിഗണിച്ചത്.

തങ്ങളെ കേൾക്കാതെയാണ് സിംഗിൾ ബെഞ്ച് ഇത്തരമൊരു തീരുമാനമെടുത്തതെന്നാണ് പിണറായി വിജയന് വേണ്ടി ഹാജരായ അഭിഭാഷകൻ ഹരിഹരൻ കോടതിയിൽ വാദിച്ചത്. അപ്പീലിൽ നവംബർ 25 മുതൽ വാദം കേൾക്കൽ ആരംഭിക്കും. എൻഫോഴ്‌സ്‌മെന്റ് ഡയറക്ടറേറ്റിനോടും വിജിലൻസിനോടും നാലാഴ്ചയ്ക്കകം മറുപടി സത്യവാങ്മൂലം സമർപ്പിക്കാൻ കോടതി നിർദ്ദേശിച്ചു. നിയമവ്യവസ്ഥയിലുള്ള പൂർണ്ണ വിശ്വാസം ആവർത്തിച്ച പിണറായി വിജയൻ, നിയമം അതിന്റെ വഴിക്ക് നീങ്ങുമെന്നും കോടതി നടപടികളിൽ പ്രതികരിച്ചു.

RELATED TOPICS: PINARAYI VIJAYAN MASAPPADI CASE, KERALA HIGH COURT VIGILANCE STAY, VEENA VIJAYAN CMRL EXALOGIC CASE, MUHAMMAD RIYAS HAWALA CASE, PINARAYI VIJAYAN COURT NEWS