കോഴിക്കോട്ട് നവംബര്‍ 14ന് അരലക്ഷം പേരെ അണിനിരത്തി ‘വോട്ട് ബച്ചാവോ, ദേശ് ബച്ചാവോ’ മഹാറാലി
കോഴിക്കോട്∙ ഭരണഘടന സംരക്ഷിക്കാനും വോട്ടു ചോര്‍ച്ചയ്ക്കെതിരെ പ്രതിരോധം തീര്‍ക്കാനും ലക്ഷ്യമിട്ട് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നവംബര്‍ 14-ന് കോഴിക്കോട് കടപ്പുറത്ത് വിപ്ലവകരമായ മഹാറാലി സംഘടിപ്പിക്കുന്നു. രാജ്യത്തിന്റെ പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ ജന്മദിനത്തില്‍ ‘വോട്ട് ബച്ചാവോ, ദേശ് ബച്ചാവോ’ (രാജ്യത്തെ രക്ഷിക്കൂ, വോട്ട് സംരക്ഷിക്കൂ) എന്ന ശക്തമായ മുദ്രാവാക്യമുയര്‍ത്തിയാണ് ഈ ബഹുജന മുന്നേറ്റം.
ചരിത്രപ്രധാനമായ ഈ റാലിയില്‍ അരലക്ഷത്തോളം പ്രവര്‍ത്തകര്‍ അണിനിരക്കും. കോണ്‍ഗ്രസിന്റെ പ്രമുഖ ദേശീയ, സംസ്ഥാന നേതാക്കള്‍ അണിനിരക്കുന്ന മഹാറാലി എഐസിസി ജനറല്‍ സെക്രട്ടറി കെ.സി. വേണുഗോപാല്‍ എം.പി ഔദ്യോഗികമായി ഉദ്ഘാടനം ചെയ്യും. വിവിധ സാമൂഹിക, സാംസ്‌കാരിക, രാഷ്ട്രീയ മണ്ഡലങ്ങളിലെ പ്രമുഖ വ്യക്തികളും ചടങ്ങില്‍ സംസാരിക്കും.
റാലിയുടെ വിജയത്തിനായി വിപുലമായ ഒരുക്കങ്ങളാണ് നടന്നുവരുന്നത്. ഇതിന്റെ ഭാഗമായി കോഴിക്കോട് ഡിസിസി ഓഫീസില്‍ ചേര്‍ന്ന പ്രത്യേക ഒരുക്കയോഗത്തില്‍ ഡിസിസി പ്രസിഡന്റ് കെ. പ്രവീണ്‍കുമാര്‍ എംഎല്‍എ അധ്യക്ഷത വഹിച്ചു. യോഗത്തില്‍ അഡ്വ. കെ. ജയന്ത് എംഎല്‍എ, വി.ടി. സൂരജ് എംഎല്‍എ, അഡ്വ. പി.എം. നിയാസ്, മുന്‍ ഡിസിസി പ്രസിഡന്റ് കെ.സി. അബു, യുഡിഎഫ് ജില്ലാ ചെയര്‍മാന്‍ വി.ഡി. ജോസഫ്, ഡിസിസി ജനറല്‍ സെക്രട്ടറി പി.എം. അബ്ദുറഹ്മാന്‍, ചോലക്കല്‍ രാജേന്ദ്രന്‍ തുടങ്ങിയ പ്രമുഖര്‍ സംസാരിച്ചു.
Source link
