അറുപതാം പിറന്നാളിൽ തേടിയെത്തിയ 12 കോടിയുടെ ഭാഗ്യം; രഹസ്യം കാത്ത് പ്രവാസി മലയാളി ഒടുവിൽ ചെയ്തത് ഇതാണ്!
നാല് പതിറ്റാണ്ട് മുമ്പ് സാധാരണക്കാരനായ ഒരു യുവാവിന്റെ സ്വപ്നങ്ങളുമായാണ് കിഷോർ പാണ്ഡുരംഗ് റാവു പ്രവാസലോകത്തേക്ക് ചേക്കേറിയത്. കഠിനാധ്വാനത്തിന്റെയും വിട്ടുവീഴ്ചയില്ലാത്ത ജീവിതത്തിന്റെയും മുപ്പത് വർഷങ്ങളാണ് അദ്ദേഹം യുഎഇയിൽ ചെലവഴിച്ചത്. എന്നാൽ അറുപതാം പിറന്നാളിന് ദിവസങ്ങൾ മാത്രം ബാക്കി നിൽക്കെ, അവിശ്വസനീയമായ ഒരു മഹാഭാഗ്യമാണ് കിഷോറിനെ തേടിയെത്തിയത്. 50 ലക്ഷം ദിർഹം (ഏകദേശം 12.95 കോടി രൂപയിലധികം) ആണ് അദ്ദേഹത്തിന് ലോട്ടറിയിലൂടെ സമ്മാനമായി ലഭിച്ചത്.
1993-ലാണ് കിഷോർ ആദ്യമായി യുഎഇയിൽ എത്തുന്നത്. ദുബായ്, അജ്മാൻ, ഷാർജ, അബുദാബി തുടങ്ങിയ വിവിധ എമിറേറ്റുകളിലായി നീണ്ട മൂന്ന് പതിറ്റാണ്ടിന്റെ പ്രവാസ പാരമ്പര്യമുണ്ട് അദ്ദേഹത്തിന്. നിലവിൽ ഷാർജയിലാണ് താമസം. ഒക്ടോബർ 8-നായിരുന്നു കിഷോറിന്റെ അറുപതാം ജന്മദിനം. അതിന് അഞ്ച് ദിവസം മുൻപ്, ഒക്ടോബർ 3-ന് നടന്ന നറുക്കെടുപ്പിലാണ് ആ ഭാഗ്യശാലിക്ക് ജാക്ക്‌പോട്ട് അടിച്ചത്.
വെറും 50 ദിർഹം മുടക്കി യുഎഇ ലോട്ടറി പ്ലാറ്റ്‌ഫോം വഴി ‘ഈസി പിക്ക്’ ഓപ്ഷൻ തിരഞ്ഞെടുത്താണ് അദ്ദേഹം ടിക്കറ്റ് സ്വന്തമാക്കിയത്. ശനിയാഴ്ച വൈകുന്നേരം നടന്ന തത്സമയ നറുക്കെടുപ്പിൽ ‘ലക്കി ഡേ’ ഗെയിമിന്റെ ‘ഡേയ്സ്’ വിഭാഗത്തിൽ ഉൾപ്പെട്ട ആറ് നമ്പറുകളും കിഷോറിന്റെ ടിക്കറ്റിലെ നമ്പറുകളുമായി പൂർണ്ണമായും ഒത്തുചേർന്നു. ‘ലക്കി ഡേ’ ഗെയിം ആരംഭിച്ചതിന് ശേഷം ഈ രാജ്യത്ത് വിതരണം ചെയ്യപ്പെട്ട ഏറ്റവും വലിയ രണ്ടാമത്തെ സമ്മാനത്തുകയാണ് കിഷോറിനെ തേടിയെത്തിയത്.
തന്റെ അക്കൗണ്ടിലേക്ക് 50 ലക്ഷം ദിർഹം എത്തിയെന്ന വാർത്ത അറിഞ്ഞപ്പോഴും കിഷോർ അങ്ങേയറ്റം ശാന്തനായിരുന്നു. ഈ സന്തോഷവാർത്ത തൽക്ഷണം ആരോടും പറയാൻ അദ്ദേഹം മുതിർന്നില്ല. ആ അത്ഭുതകരമായ നിമിഷം കുറച്ചുനേരം മനസ്സിൽ മാത്രം സൂക്ഷിച്ച ശേഷം, ഒടുവിൽ അദ്ദേഹം തന്റെ പ്രിയതമയോട് മാത്രമാണ് ഈ സന്തോഷവിശേഷം പങ്കുവെച്ചത്.
