എഐ വിപ്ലവം: ടെക് കമ്പനികളിലെ കൂട്ടപ്പിരിച്ചുവിടലും തൊഴിൽ മേഖലയിലെ പ്രതിസന്ധികളും
ആർട്ടിഫിഷ്യൽ ഇന്റലിജൻസും അത് നൽകുന്ന പ്രവർത്തനക്ഷമതയും അടിസ്ഥാനമാക്കിയുള്ള ഒരു പുതിയ കാലഘട്ടത്തിലേക്ക് ലോകം നീങ്ങുമ്പോൾ, ആഗോള സാങ്കേതിക വിപണി വലിയൊരു പൊളിച്ചെഴുത്തിന് സാക്ഷ്യം വഹിക്കുകയാണ്. ആമസോൺ, മൈക്രോസോഫ്റ്റ്, ഒറാക്കിൾ, മെറ്റ തുടങ്ങിയ വമ്പൻ ടെക് കമ്പനികളെല്ലാം തങ്ങളുടെ ജീവനക്കാരുടെ എണ്ണം വെട്ടിക്കുറയ്ക്കുന്നതിനും വിരമിക്കൽ ആനുകൂല്യങ്ങൾ നൽകി ഒഴിവാക്കുന്നതിനും നിർബന്ധിതരായിരിക്കുകയാണ്. ടെക് മേഖലയിലെ തൊഴിൽ നഷ്ടങ്ങളെ കൃത്യമായി രേഖപ്പെടുത്തുന്ന ‘layoffs.fyi’ എന്ന വെബ്സൈറ്റിന്റെ റിപ്പോർട്ട് പ്രകാരം, ഈ വർഷം ഇതിനകം 93,000-ത്തിലധികം പേർക്ക് ജോലി നഷ്ടപ്പെട്ടു കഴിഞ്ഞു. എന്തുകൊണ്ടാണ് വൻകിട കമ്പനികൾ കൂട്ടത്തോടെ ജീവനക്കാരെ പിരിച്ചുവിടുന്നത്? ഇതിന്റെ പിന്നിലെ ഗൂഢലക്ഷ്യങ്ങളും യഥാർത്ഥ കാരണങ്ങളും എന്തൊക്കെയാണെന്ന് പരിശോധിക്കേണ്ടതുണ്ട്.
ഈ വർഷത്തെ കണക്കുകൾ പ്രകാരം, ആമസോൺ 16,000 പേരെയും (1.07%), ഡെൽ 11,000 പേരെയും (10%), മെറ്റ 10,400 പേരെയും (13%), ബ്ലോക് 4,000 പേരെയും (50%), സിസ്കോ 4,000 പേരെയും (50%) വീതം ഒഴിവാക്കി. ഇതുകൂടാതെ ഊബർ 3300 പേരെയും (10%), ഇൻറ്റ്യൂട്ട് 3000 പേരെയും (17%), വൈസ്ടെക് 2000 പേരെയും (30%) പിരിച്ചുവിട്ടവരിൽ ഉൾപ്പെടുന്നു. ഒറാക്കിൾ കമ്പനിയിൽ നിന്ന് മാത്രം 21,000 പേരാണ് പുറത്തായത്, ഇത് അവരുടെ ആകെ ജീവനക്കാരുടെ 13 ശതമാനത്തോളം വരും. 2025 സെപ്റ്റംബറോടെ സെയിൽസ്ഫോഴ്സ് തങ്ങളുടെ കസ്റ്റമർ സപ്പോർട്ട് വിഭാഗത്തിലെ ജീവനക്കാരുടെ എണ്ണം 9000-ൽ നിന്ന് 5000 ആയി കുറച്ചിരുന്നു. പിരിച്ചുവിടൽ നടപടികൾ ഇനിയും തുടരുമെന്നാണ് സൂചന. ആമസോൺ രണ്ടാം ഘട്ടത്തിൽ 250 പേരെ കൂടി ഒഴിവാക്കി. മൈക്രോസോഫ്റ്റ് ആകട്ടെ, 60,000 പേർക്കായി സ്വമേധയാ വിരമിക്കൽ പാക്കേജുകൾ പ്രഖ്യാപിച്ചു കഴിഞ്ഞു; മൊത്തം ജീവനക്കാരിൽ 27 ശതമാനം പേരെ ഒഴിവാക്കാനാണ് അവർ ലക്ഷ്യമിടുന്നത്.
ഈ പ്രതിസന്ധി ടെക് ലോകത്ത് മാത്രം ഒതുങ്ങിനിൽക്കുന്നില്ല. ബ്രിട്ടിഷ് ബഹുരാഷ്ട്ര ബാങ്കായ ബാക്ലൈയ്സ് തങ്ങളുടെ മൊത്തം ജീവനക്കാരിൽ അഞ്ചു ശതമാനത്തോളം പേരെ, അതായത് 5000 പേരെ പിരിച്ചുവിടാൻ തീരുമാനിച്ചിട്ടുണ്ട്. ബാങ്കിങ് ഭീമനായ അമേരിക്കൻ എക്സ്പ്രസ് 3500 പേരെ ഒഴിവാക്കാനൊരുങ്ങുന്നതായും റിപ്പോർട്ടുകളുണ്ട്.
എന്തുകൊണ്ടാണ് ഈ കൂട്ടപ്പിരിച്ചുവിടലുകൾ? സാധാരണയായി സാമ്പത്തിക പ്രതിസന്ധി നേരിടുമ്പോൾ കമ്പനികൾ ജീവനക്കാരെ പിരിച്ചുവിടാറുണ്ട്. എന്നാൽ, വൻ ലാഭത്തിൽ പ്രവർത്തിക്കുന്ന കമ്പനികൾ പോലും ഈ പാത സ്വീകരിക്കുന്നതിന് പിന്നിലെ പ്രധാന കാരണം ആർട്ടിഫിഷ്യൽ ഇന്റലിജൻസിന്റെ (എഐ) സ്വാധീനമാണ്. എഐയുടെയും ഓട്ടോമേഷന്റെയും അവിശ്വസനീയമായ വളർച്ച സാങ്കേതിക മേഖലയെ അടിമുടി മാറ്റുകയാണ്. പരമ്പരാഗത തസ്തികകളിലെ ജോലിഭാരം കുറച്ച്, കമ്പനികൾ തങ്ങളുടെ മൂലധനവും വിഭവങ്ങളും എഐ സാങ്കേതികവിദ്യകളിലേക്ക് വഴിമാറ്റി ചെലവഴിക്കുകയാണ്. പ്രവർത്തന മികവ് വർദ്ധിപ്പിക്കാനാണ് പിരിച്ചുവിടലുകൾ നടത്തുന്നതെന്ന് ആമസോൺ വക്താക്കൾ വിശദീകരിക്കുന്നു. എഐ മോഡലുകൾ വികസിപ്പിക്കാനും ഡാറ്റാ സെന്ററുകൾ സജ്ജമാക്കാനുമാണ് കമ്പനികൾ ഇപ്പോൾ മുൻഗണന നൽകുന്നത്. ഈ വർഷം മാത്രം ആമസോൺ എഐ മേഖലയിൽ 220 ബില്യൺ ഡോളർ നിക്ഷേപിക്കുമെന്നാണ് ലഭ്യമായ വിവരം.
