ഗവർണറുടെ ശുപാർശയിൽ കുരുങ്ങി പിഎസ്‌സി; ഇനി എന്ത് സംഭവിക്കും? ആശങ്കയിൽ ഉദ്യോഗാർഥികൾ
തിരുവനന്തപുരം ∙ ചെയർമാനെയും മറ്റ് അംഗങ്ങളെയും സ്ഥാനത്തുനിന്ന് നീക്കം ചെയ്യണമെന്ന് ആവശ്യപ്പെട്ട് ഗവർണർ രാഷ്ട്രപതിക്ക് ശുപാർശ നൽകിയ പശ്ചാത്തലത്തിൽ, പിഎസ്‌സിയിൽ കടുത്ത അനിശ്ചിതത്വം നിലനിൽക്കുന്നു. കഴിഞ്ഞദിവസം നടന്ന കമ്മിഷൻ യോഗത്തിലും ഈ വിഷയത്തിൽ അന്തിമതീരുമാനത്തിലെത്താൻ കഴിഞ്ഞില്ല. ഗവർണറുടെ ശുപാർശ രാഷ്ട്രപതി സുപ്രീം കോടതിയുടെ പരിഗണനയ്ക്ക് വിട്ടതിന് ശേഷം മാത്രമെ പിഎസ്‌സി തുടർനടപടികൾ സ്വീകരിക്കുകയുള്ളൂ. അതേസമയം, ചെയർമാൻ എം.ആർ. ബൈജുവിന്റെ സ്വേച്ഛാധിപത്യപരമായ പ്രവർത്തനരീതികളാണ് നിലവിലെ പ്രതിസന്ധിക്ക് കാരണമെന്ന വിമർശനം പിഎസ്‌സിയിലെ അംഗങ്ങൾക്കിടയിൽ തന്നെ ശക്തമാണ്.
പിഎസ്‌സിയിലെ ചില അംഗങ്ങൾ നേരിട്ടെത്തി മുഖ്യമന്ത്രിയുമായി അനൗദ്യോഗിക ചർച്ചകൾ നടത്തുകയും സാഹചര്യം വിശദീകരിക്കുകയും ചെയ്തിട്ടുണ്ട്. ഉദ്യോഗാർഥികളും സമാനമായ രീതിയിൽ തങ്ങളുടെ ആശങ്കകൾ മുഖ്യമന്ത്രിയെ അറിയിച്ചിട്ടുണ്ട്. ചെയർമാന്റെ നേതൃത്വത്തിലുള്ള ഒരു വിഭാഗവും ബാക്കി അംഗങ്ങൾ ഉൾപ്പെടുന്ന മറ്റൊരു വിഭാഗവും എന്ന നിലയിൽ പിഎസ്‌സിയിൽ ചേരിതിരിവ് പ്രകടമാണ്.
