കൽപറ്റ ടൗൺഷിപ്പ്: ഗുണഭോക്താക്കളെ കണ്ടെത്താനുള്ള നറുക്കെടുപ്പ് 31-ന്; വീടുകൾ നവംബറിൽ ഉടമകളിലേക്ക്
കൽപറ്റ ടൗൺഷിപ്പിന്റെ രണ്ടാംഘട്ട നിർമാണത്തിൽ ഉൾപ്പെടുന്ന വീടുകളുടെ ഗുണഭോക്താക്കളെ കണ്ടെത്തുന്നതിനായുള്ള നറുക്കെടുപ്പ് ഈ മാസം 31-ന് നടക്കും. ജില്ലാ ദുരന്ത നിവാരണ അതോറിറ്റി ചേർന്ന യോഗത്തിലാണ് ഇത് സംബന്ധിച്ച തീരുമാനമെടുത്തത്. മേപ്പാടി എം.എസ്.എ ഓഡിറ്റോറിയത്തിൽ വെച്ചായിരിക്കും 149 ഗുണഭോക്താക്കളെ തിരഞ്ഞെടുക്കുന്ന പ്രക്രിയ നടക്കുക.
ടൗൺഷിപ്പിലെ നിർമാണ പ്രവർത്തനങ്ങൾ വേഗത്തിലാക്കി നവംബർ മാസത്തോടെ ഗുണഭോക്താക്കൾക്ക് വീടുകൾ കൈമാറാൻ സജ്ജമാക്കണമെന്ന് ജില്ലാ പഞ്ചായത്ത് പ്രസിഡന്റും ഡി.ഡി.എം.എ കോ-ചെയർപഴ്സണുമായ ചന്ദ്രിക കൃഷ്ണൻ ഉദ്യോഗസ്ഥർക്ക് കർശന നിർദേശം നൽകി. കൂടാതെ, പ്രദേശത്ത് മഴവെള്ളം കെട്ടിക്കിടക്കുന്ന പ്രശ്നം പരിഹരിക്കുന്നതിനായി അടിയന്തര ഇടപെടലുകൾ നടത്താനും അവർ ആവശ്യപ്പെട്ടു. ടൗൺഷിപ്പിലും കൽപറ്റ നഗരസഭയുടെ പരിധിയിലുമുള്ള വെള്ളക്കെട്ട് ഒഴിവാക്കുന്നതിനായി സി.ഡബ്ല്യു.ആർ.ഡി.എമ്മിന്റെ മേൽനോട്ടത്തിൽ വിശദമായ പഠനം സംഘടിപ്പിക്കും. റോഡുകളുടെയും ഡ്രെയിനേജുകളുടെയും അറ്റകുറ്റപ്പണികൾക്കായി മുനിസിപ്പൽ സെക്രട്ടറിയും ഡി.ഡി.എം.എ വിദഗ്ധരും ഉൾപ്പെടുന്ന പ്രത്യേക സമിതിയെയും നിയോഗിക്കും.
കള്ളാടിയിൽ മണ്ണിടിച്ചിലിനെത്തുടർന്ന് സുരക്ഷാ കാരണങ്ങളാൽ മാറ്റിപ്പാർപ്പിച്ചിരിക്കുന്ന 26 കുടുംബങ്ങൾക്ക് സുരക്ഷിതമായി സ്വന്തം വീടുകളിലേക്ക് മടങ്ങിയെത്താനുള്ള സാഹചര്യം ഒരുക്കണമെന്നും ജില്ലാ പഞ്ചായത്ത് പ്രസിഡന്റ് യോഗത്തിൽ ഓർമിപ്പിച്ചു. കള്ളാടിയിലെ മണ്ണിടിച്ചിൽ പ്രദേശത്ത് അടിഞ്ഞുകൂടിയ 2.10 ലക്ഷം ക്യൂബിക് മീറ്റർ മണ്ണ് നീക്കം ചെയ്യേണ്ടത് സംബന്ധിച്ച് വിദഗ്ധ സമിതി റിപ്പോർട്ട് സമർപ്പിച്ചിട്ടുണ്ട്. മണ്ണ് മാറ്റാനാവശ്യമായ സ്ഥലം കണ്ടെത്തി ഒക്ടോബർ 31-നകം കൃത്യമായ കർമപദ്ധതി തയ്യാറാക്കണമെന്നും നിർദേശം നൽകിയിട്ടുണ്ട്. കാലാവധി അവസാനിക്കുന്നതിന് മുൻപ് റിപ്പോർട്ട് ലഭിക്കാത്ത പക്ഷം, ജില്ലാ ഭരണകൂടം തന്നെ സ്ഥലം കണ്ടെത്തി പൊതുമരാമത്ത് വകുപ്പിന്റെ സഹായത്തോടെ മണ്ണ് നീക്കം ചെയ്യുമെന്ന് ജില്ലാ കലക്ടർ വ്യക്തമാക്കി.
കലക്ടറേറ്റ് മിനി കോൺഫറൻസ് ഹാളിൽ നടന്ന യോഗത്തിൽ എ.ഡി.എം കെ. അജീഷ്, ടൗൺഷിപ്പ് ചീഫ് ഓപ്പറേറ്റിങ് ഓഫിസർ ഇ.ടി. രാകേഷ്, ഡെപ്യൂട്ടി കലക്ടർ കെ. മനോജ് കുമാർ, മേപ്പാടി ഗ്രാമപഞ്ചായത്ത് പ്രസിഡന്റ് റംല ഹംസ എന്നിവരും പങ്കെടുത്തു.
