ടെൽ അവീവ്∙ ഇസ്രായേലിൽ നിർണായകമായ പൊതുതിരഞ്ഞെടുപ്പിന് മണിക്കൂറുകൾ മാത്രം ശേഷിക്കെ, ടെൽ അവീവ് നഗരത്തിൽ ആണവസ്ഫോടനം നടക്കുന്നതായി ചിത്രീകരിക്കുന്ന ആർട്ടിഫിഷ്യൽ ഇന്റലിജൻസ് (എഐ) ചിത്രം പങ്കുവെച്ച് പ്രധാനമന്ത്രി ബെന്യാമിൻ നെതന്യാഹു വിവാദത്തിൽ. തന്റെ ഔദ്യോഗിക ഇൻസ്റ്റാഗ്രാം പേജിലൂടെയാണ് നെതന്യാഹു ഈ ചിത്രം പുറത്തുവിട്ടത്. ഇറാനിൽ നിന്നുയരുന്ന ആണവ ഭീഷണിയെക്കുറിച്ചുള്ള ശക്തമായ മുന്നറിയിപ്പുകൾ ഉൾക്കൊള്ളുന്ന വലിയൊരു കുറിപ്പും ഇതിനൊപ്പമുണ്ട്.
ഇറാനുമായുള്ള ആണവ വിഷയത്തിൽ ട്രംപിന് തങ്ങളുടെ ദൗത്യം പൂർത്തീകരിക്കാൻ ഇനി വെറും രണ്ടു വർഷം മാത്രമാണുള്ളതെന്നും, അതിനുശേഷം അമേരിക്കയുടെ നേതൃത്വത്തിൽ ആരായിരിക്കും എത്തുകയെന്നത് അനിശ്ചിതത്വത്തിലാണെന്നും അദ്ദേഹം വ്യക്തമാക്കുന്നു. ‘‘ഇറാനിൽ ഇപ്പോൾ ആരംഭിച്ചിരിക്കുന്ന സുപ്രധാന പ്രവർത്തനങ്ങൾ പൂർത്തിയാക്കാൻ ട്രംപിന് ഇനി രണ്ട് വർഷത്തെ സമയം മാത്രമേയുള്ളൂ. അതിനുശേഷം കമല ഹാരിസോ മറ്റാരെങ്കിലുമോ ആയിരിക്കാം അമേരിക്കയുടെ ഭരണസാരഥ്യത്തിൽ വരുന്നത്. വരുംകാലങ്ങളിൽ നമ്മുടെ രാജ്യത്തിന്റെ സുരക്ഷയ്ക്കും നിലനിൽപ്പിനും ആവശ്യമായ കാര്യങ്ങൾ നടപ്പിലാക്കാൻ ലഭിച്ചിരിക്കുന്ന ഈ ചെറിയ സമയം പരമാവധി പ്രയോജനപ്പെടുത്തണം. എല്ലാവരും ഈ ലക്ഷ്യത്തിനായി അണിനിരക്കണം,’’ നെതന്യാഹു കുറിച്ചു.
അതേസമയം, നെതന്യാഹുവിന്റെ ഈ നടപടിക്കെതിരെ കടുത്ത പ്രതിഷേധമാണ് വിവിധ കോണുകളിൽ നിന്ന് ഉയരുന്നത്. ജനങ്ങളിൽ അനാവശ്യ ഭീതി പരത്തി വോട്ടുകൾ നേടാനുള്ള തരംതാഴ്ന്ന തന്ത്രമാണിതെന്ന് പ്രതിപക്ഷം ആരോപിക്കുന്നു. തിരഞ്ഞെടുപ്പ് അടുത്തതോടെ നെതന്യാഹുവും അദ്ദേഹത്തിന്റെ പാർട്ടിയും പരിഭ്രാന്തിയിലാണെന്നും, മാനസിക നില തെറ്റിയതുപോലെ പെരുമാറുന്ന അദ്ദേഹത്തെ ആരെങ്കിലും സമൂഹമാധ്യമങ്ങളിൽ നിന്ന് മാറ്റിനിർത്തണമെന്നും ഡെമോക്രാറ്റ്സ് ചെയർമാൻ യായർ ഗോലൻ തുറന്നടിച്ചു.
ഇസ്രായേൽ പാർലമെന്റായ നെസറ്റിലേക്കുള്ള തിരഞ്ഞെടുപ്പ് നാളെ നടക്കും. 120 സീറ്റുകളുള്ള സഭയിൽ കേവല ഭൂരിപക്ഷത്തിന് 61 സീറ്റുകളാണ് വേണ്ടത്. കഴിഞ്ഞ 19 വർഷമായി അധികാരത്തിന്റെ കേന്ദ്രബിന്ദുവായിരുന്ന നെതന്യാഹുവിനെ സംബന്ധിച്ചിടത്തോളം ഈ തിരഞ്ഞെടുപ്പ് അതിജീവനത്തിന്റെ പോരാട്ടം കൂടിയാണ്.
