വലിയ സത്യങ്ങളും ചെറിയ നുണകളും തമ്മിലുള്ള പോരാട്ടമാണിത്; എന്നെക്കുറിച്ചല്ല ഈ വിവാദമെന്ന് പൂർണ്ണബോധ്യമുണ്ട്: ദിവ്യ എസ് അയ്യർ

ടി.വി. അനുപമ, ദിവ്യ എസ്. അയ്യർ

തിരുവനന്തപുരം: തദ്ദേശ സ്വയംഭരണ വകുപ്പിൽ ഉദ്യോഗസ്ഥർക്കിടയിൽ ഭിന്നതയുണ്ടെന്ന തരത്തിൽ പ്രചരിക്കുന്ന വാർത്തകൾ ദിവ്യ എസ്. അയ്യർ തള്ളിക്കളഞ്ഞു. ‘തർക്കവുമില്ല, അതിനൊപ്പം മത്സരവുമില്ല’ എന്നാണ് ദിവ്യ എസ്. അയ്യർ തന്റെ ഇൻസ്റ്റഗ്രാം പേജിൽ വ്യക്തമാക്കിയത്. വലിയ സത്യങ്ങളും ചെറിയ നുണകളും തമ്മിലാണ് യഥാർത്ഥ പോരാട്ടമെന്നും അവർ ചൂണ്ടിക്കാണിച്ചു.

മനുഷ്യരെ സ്നേഹിക്കുന്നു, ആശ്വസിപ്പിക്കുന്നു, പ്രശംസിക്കുന്നു എന്നൊക്കെയുള്ള കുറ്റപ്പെടുത്തലുകൾ മാത്രമാണ് ഇതുവരെ തനിക്കെതിരെ ഉയർന്നിട്ടുള്ളത്. എന്നാൽ ഇപ്പോൾ തർക്കമെന്നും മത്സരമെന്നും കേൾക്കുമ്പോൾ, അത് തന്നെയല്ലെന്നും താനുമായി യാതൊരു ബന്ധവുമില്ലെന്നുമുള്ള ബോധ്യമാണ് മനസ്സിൽ വരുന്നത്. ഞങ്ങളുടെ ഭാഗത്തുനിന്നും ഒരിക്കലും ഉണ്ടാകാത്ത വികാരങ്ങളാണിവ. ലഭിച്ച കൃത്യമായ നിർദ്ദേശങ്ങളുടെ അടിസ്ഥാനത്തിലാണ് ഔദ്യോഗിക ചുമതലകൾ നിർവഹിച്ചതെന്നതാണ് യാഥാർത്ഥ്യം. തികച്ചും യാഥാർത്ഥ്യവുമായി ബന്ധമില്ലാത്ത ഇത്തരം വ്യാജ പ്രചാരണങ്ങൾ അവസാനിപ്പിക്കണമെന്നും അവർ അഭ്യർത്ഥിച്ചു.

സംസ്ഥാനം മാലിന്യമുക്തമാക്കുന്നതിന്റെ ഭാഗമായി തദ്ദേശ വകുപ്പിന്റെ കീഴിൽ ടി.വി. അനുപമയും ദിവ്യ എസ്. അയ്യറും രണ്ട് വ്യത്യസ്ത പദ്ധതികൾ അവതരിപ്പിച്ചിരുന്നു. ഇതിനുപിന്നാലെയാണ് വകുപ്പിനുള്ളിൽ ഉദ്യോഗസ്ഥർ തമ്മിൽ ശത്രുത ശക്തമാണെന്ന തരത്തിലുള്ള റിപ്പോർട്ടുകൾ പുറത്തുവന്നത്. തദ്ദേശ വകുപ്പ് സെക്രട്ടറിയായ ടി.വി. അനുപമ ‘നിർമലം’ എന്ന പദ്ധതിയും, തദ്ദേശ വകുപ്പ് പ്രിൻസിപ്പൽ ഡയറക്ടറായ ദിവ്യ എസ്. അയ്യർ ‘ഐ.സി. 100 ചലഞ്ച്’ എന്ന പദ്ധതിയുമാണ് ആരംഭിച്ചത്.

ഇൻസ്റ്റഗ്രാം പോസ്റ്റിന്റെ പൂർണരൂപം:

പോരും ഇല്ലാ…
പോരാത്തതിനു മത്സരവും ഇല്ലാ…
മനുഷ്യരെ സ്നേഹിക്കുന്നു, പുൽകുന്നു, പുകഴ്ത്തുന്നു എന്ന് മാത്രമേ ഇതുവരെ മാധ്യമങ്ങളിലും സമൂഹമാധ്യമങ്ങളിലും എന്നെ ‘പഴിചാരി’ കേട്ട ഓർമ്മയുള്ളൂ.

ഇപ്പോൾ പോര്, മത്സരം, ചേരിതിരിവ് എന്നൊക്കെ കേൾക്കുമ്പോൾ അത് ഞാൻ അല്ല, എന്നെക്കുറിച്ച് അല്ല എന്ന ഉറച്ചബോധ്യം മനസ്സിൽ തെളിയുന്നുണ്ട്. ഒരുനാളും ഒരാളോടും ഞങ്ങൾക്ക് തോന്നാത്ത വികാരങ്ങൾ ആണ് ഇവ. വ്യക്തമായ നിർദ്ദേശം ലഭിച്ചതിനെ തുടർന്ന് ഞങ്ങൾ കൃത്യനിർവഹണം നടത്തിയിട്ടുണ്ട് എന്നതാണ് സത്യം. ഭാവനാവിരാജിതമായ പ്രചരണങ്ങൾക്ക് വിരാമം ഇടണം എന്ന് അഭ്യർത്ഥിക്കുന്നു.

ഈയടുത്തകാലത്ത് ആദി എന്ന യുവകവിയുടെ ഒരു കവിതയിൽ വായിച്ചത് ഓർക്കുന്നു; ‘വലിയ സത്യങ്ങളും ചെറിയ നുണകളും തമ്മിലാണ് പോര്’. അത് മാത്രമാണ് പോര്.

        RELATED TOPICS: DIVYA S IYER, KERALA LOCAL SELF GOVERNMENT DEPARTMENT, TV ANUPAMA NIRMALAM PROJECT, IC 100 CHALLENGE, DIVYA S IYER INSTAGRAM POST