ഈ രണ്ട് സിനിമകളിലെയും ഗാനങ്ങൾ അക്കാലത്ത് വൻ തരംഗമാണ് സൃഷ്ടിച്ചത്. ഇന്നും ആരാധകർക്കിടയിൽ ആ ഗാനങ്ങൾക്ക് വലിയ സ്വീകാര്യതയുണ്ട്.
പ്രത്യേകിച്ച്, ‘അണ്ണാമലൈ’യിലെ എസ്.പി. ബാലസുബ്രഹ്മണ്യം ആലപിച്ച ‘വന്തേണ്ടാ പാൽക്കാരൻ’ എന്ന ഗാനത്തിന്റെ വൻ വിജയം ഒരു പുതിയ ട്രെൻഡിനാണ് തുടക്കമിട്ടത്. അതിനുശേഷം വന്ന ‘ബാഷ’, ‘മുത്തു’, ‘അരുണാചലം’, ‘പടയപ്പ’, ‘ചന്ദ്രമുഖി’ തുടങ്ങി നിരവധി ചിത്രങ്ങളിൽ എസ്.പി.ബിയുടെ ശബ്ദത്തിൽ തുടങ്ങുന്ന ഗാനങ്ങളിലൂടെ രജനികാന്ത് സ്‌ക്രീനിലെത്തുന്നത് ഒരു പതിവായി മാറി.
‘അണ്ണാമലൈ’ ചിത്രത്തിൽ ദേവ ഒരുക്കിയ പശ്ചാത്തല സംഗീതത്തോടെ എത്തുന്ന ‘സൂപ്പർ സ്റ്റാർ രജനി’ എന്ന പ്രശസ്തമായ ടൈറ്റിൽ കാർഡ്, ഏറ്റവും പുതിയ ചിത്രമായ ‘ജയിലർ’ വരെ രജനികാന്ത് സിനിമകളിൽ അവിഭാജ്യ ഘടകമായി തുടരുന്നു. മറ്റ് സംഗീത സംവിധായകർ ഒരുക്കിയ ചിത്രങ്ങളിൽ പോലും, തിയേറ്ററുകളിൽ ആരാധകരുടെ ആവേശം വാനോളം ഉയർത്തുന്നത് ദേവയുടെ ഈ സംഗീതമാണ്.
‘അണ്ണാമലൈ’യ്ക്ക് ശേഷം സംഗീത സംവിധായകൻ ദേവ തന്റേതായ ഒരു ശൈലി രൂപപ്പെടുത്തിയെടുത്തു. പിൽക്കാലത്ത് ദേവയുടെ മുഖമുദ്രയായി മാറിയ ‘ഗാന പാട്ടുകൾ’, ‘സൂര്യൻ’ എന്ന ചിത്രത്തിലെ ‘ലാലാക്കു ഡോൾ ഡപ്പി മാ’ എന്ന ഗാനത്തിലൂടെയാണ് ആരംഭിച്ചത്. തൊണ്ണൂറുകളിൽ ‘ദേവ ഹിറ്റ്സ്’, ‘ദേവ ഗാന സോംഗ്സ്’ തുടങ്ങിയ കാസറ്റുകൾക്ക് അക്കാലത്ത് വലിയ വിപണിയായിരുന്നു ഉണ്ടായിരുന്നത്.
