കേരളത്തിൽ എയിംസ് സ്ഥാപിക്കുന്നത് സംബന്ധിച്ച് ഇതുവരെ അന്തിമ തീരുമാനം കൈക്കൊണ്ടിട്ടില്ലെന്നാണ് ഡെപ്യൂട്ടി സോളിസിറ്റർ ജനറൽ കോടതിയെ അറിയിച്ചത്. ആരോഗ്യമേഖലയിൽ പിന്നോക്കം നിൽക്കുന്ന സംസ്ഥാനങ്ങൾക്കാണ് പ്രഥമ പരിഗണന നൽകുന്നത്. എന്നാൽ കേരളം ആരോഗ്യരംഗത്ത് മുന്നിലാണെന്ന് ചൂണ്ടിക്കാണിച്ചപ്പോഴാണ്, അത് എങ്ങനെയാണ് അയോഗ്യതയാകുകയെന്ന് കോടതി തിരിച്ചുചോദിച്ചത്. കേന്ദ്രം നിരത്തിയ കാരണങ്ങളിൽ കോടതി അസംതൃപ്തി പ്രകടിപ്പിച്ചു. കേരളത്തിന്റെ ഈ ന്യായമായ ആവശ്യം വർഷങ്ങളായി കേന്ദ്ര സർക്കാരിന്റെ പരിഗണനയിലുണ്ടെങ്കിലും ഇതുവരെ യാതൊരുവിധ നടപടിയും ഉണ്ടായിട്ടില്ലെന്നും കോടതി നിരീക്ഷിച്ചു.
എയിംസിനായി കോഴിക്കോട് ജില്ലയിലെ കിനാലൂരിൽ സംസ്ഥാന സർക്കാർ 200 ഏക്കർ ഭൂമി മാറ്റിവെച്ചിട്ടുണ്ട്. സാധാരണ ജനങ്ങൾക്ക് വലിയ സ്വകാര്യ ആശുപത്രികളെ ആശ്രയിക്കാൻ സാധിക്കുമോയെന്നും, ഈ വിഷയം കഴിഞ്ഞ നാലു വർഷമായി കേന്ദ്ര മന്ത്രിസഭയുടെ അനുമതിക്കായി കാത്തുകിടക്കുകയല്ലേ എന്നും കോടതി ആരാഞ്ഞു.
എന്നിരുന്നാലും, ആരോഗ്യരംഗത്തെ കേരളത്തിന്റെ മികച്ച പ്രകടനം ഒരു കുറവായി കാണുന്നില്ലെന്നും അർഹമായ മുൻഗണനാക്രമത്തിന്റെ അടിസ്ഥാനത്തിൽ വിഷയം പരിഗണിക്കുമെന്നും ഡെപ്യൂട്ടി സോളിസിറ്റർ ജനറൽ വിശദീകരിച്ചു. എല്ലാ സംസ്ഥാനങ്ങളിലും എയിംസ് സ്ഥാപിക്കുക എന്നതാണ് സർക്കാരിന്റെ പൊതുവായ നയമെന്നും അദ്ദേഹം കൂട്ടിച്ചേർത്തു.
Source link
