ശക്തമായ മഴ മുന്നറിയിപ്പ്: സംസ്ഥാനത്ത് ഇന്ന് വ്യാപക മഴയ്ക്ക് സാധ്യത; ഏഴ് ജില്ലകളിൽ ജാഗ്രത നിർദ്ദേശം

കേരള കൗമുദി ഫയൽ ചിത്രം

തിരുവനന്തപുരം: കേരളത്തിൽ വ്യാപകമായി മഴ പെയ്യാൻ സാദ്ധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇതിന്റെ ഭാഗമായി ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട് എന്നീ ഏഴ് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്. ഈ പ്രദേശങ്ങളിൽ ഒറ്റപ്പെട്ടയിടങ്ങളിൽ ശക്തമായ മഴയ്ക്കാണ് സാദ്ധ്യത കാണുന്നത്. ഒരു ദിവസത്തിനുള്ളിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ പെയ്യുന്ന അവസ്ഥയാണ് ശക്തമായ മഴ എന്നത് കൊണ്ട് ഉദ്ദേശിക്കുന്നത്. വരുന്ന ഒക്‌ടോബർ ഒൻപതാം തീയതി പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും യെല്ലോ അലർട്ട് ബാധകമായിരിക്കും.

കടൽക്ഷോഭ പ്രതിഭാസത്തിന്റെ പശ്ചാത്തലത്തിൽ, തിരുവനന്തപുരം ജില്ലയിലെ തീരപ്രദേശങ്ങളിൽ (കാപ്പിൽ മുതൽ പൊഴിയൂർ വരെ) ഇന്ന് വൈകുന്നേരം അഞ്ചര മണി മുതൽ നാളെ രാത്രി പതിനൊന്നര മണി വരെ 0.8 മീറ്റർ മുതൽ 1.1 മീറ്റർ വരെ ഉയർന്ന തിരമാലകൾ ആഞ്ഞടിക്കാൻ സാദ്ധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം മുന്നറിയിപ്പ് നൽകിയിട്ടുണ്ട്. കൂടാതെ, സമാനമായ പ്രതിഭാസത്തിന്റെ ഫലമായി കന്യാകുമാരി തീരത്തും നാളെ രാത്രി എട്ടര മണി വരെ 0.9 മുതൽ 1.3 മീറ്റർ വരെ ഉയരത്തിൽ തിരമാലകൾ കയറിവരാൻ സാദ്ധ്യതയുണ്ടെന്നും അറിയിപ്പിൽ വ്യക്തമാക്കിയിരിക്കുന്നു.

ജാഗ്രതാ നിർദേശങ്ങൾ

1. കടൽക്ഷോഭം ശക്തമാകാൻ സാദ്ധ്യതയുള്ള ദുരന്തസാദ്ധ്യതാ മേഖലകളിൽ കഴിയുന്നവർ അധികാരികളുടെ നിർദ്ദേശപ്രകാരം സുരക്ഷിതമായ മറ്റ് സ്ഥാനങ്ങളിലേക്ക് മാറിത്താമസിക്കേണ്ടതാണ്.

2. ഈ സമയത്ത് യാതൊരു കാരണവശാലും ചെറിയ വള്ളങ്ങളും ബോട്ടുകളും കടലിലേക്ക് തുഴഞ്ഞു പോകരുത്.

3. കടൽ പ്രക്ഷുബ്ധമാകുന്നതോടൊപ്പം വലിയ തിരമാലകൾ ഉണ്ടാകുന്ന ഇത്തരം സന്ദർഭങ്ങളിൽ മത്സ്യബന്ധന യാനങ്ങൾ കടലിലിറക്കുന്നത് എത്രത്തോളം അപകടകരമാണോ, അതുപോലെ തന്നെ അവ കരയിലേക്ക് അടുപ്പിക്കുന്നതും അപകടം വരുത്തിവെക്കും. അതിനാൽ തിരമാലകളുടെ ശക്തി കൂടിനിൽക്കുന്ന വേളകളിൽ വള്ളങ്ങളും ബോട്ടുകളും കടലിലിറക്കുന്നതും കരയിലേക്ക് കയറ്റുന്നതും പൂർണ്ണമായും ഒഴിവാക്കുക.

4. സമുദ്ര പഠന കേന്ദ്രത്തിന്റെ ഈ മുന്നറിയിപ്പ് പിൻവലിക്കുന്നത് വരെ കടൽതീരങ്ങളിലേക്കുള്ള വിനോദയാത്രകളും ബീച്ചുകൾ കേന്ദ്രീകരിച്ചുള്ള മറ്റ് വിനോദ പരിപാടികളും പൂർണ്ണമായി നിർത്തിവെക്കണം.

5. മത്സ്യബന്ധനത്തിന് ഉപയോഗിക്കുന്ന വള്ളങ്ങളും ബോട്ടുകളും മറ്റ് യാനങ്ങളും ഹാർബറുകളിൽ സുരക്ഷിതമായ രീതിയിൽ കയറിൽ കെട്ടി സൂക്ഷിക്കേണ്ടതാണ്. വള്ളങ്ങൾ തമ്മിൽ ആവശ്യത്തിന് അകലം പാലിക്കുന്നത് അവ പരസ്പരം കൂട്ടിയിടിച്ചുള്ള നഷ്ടങ്ങൾ ഒഴിവാക്കാൻ സഹായിക്കും. കൂടാതെ, മൽസ്യബന്ധനത്തിന് ഉപയോഗിക്കുന്ന മറ്റ് സാമഗ്രികളുടെ സുരക്ഷിതത്വവും ഉറപ്പുവരുത്തുക.

6. കടൽത്തീരങ്ങളിലേക്കുള്ള സഞ്ചാരങ്ങളും വെള്ളത്തിലിറങ്ങിയുള്ള ആഘോഷങ്ങളും പൂർണ്ണമായി ഒഴിവാക്കാൻ ശ്രദ്ധിക്കുക.

7. തീരപ്രദേശങ്ങൾ ഇടിഞ്ഞുതാഴാൻ സാദ്ധ്യതയുള്ളതിനാൽ ജനങ്ങൾ പ്രത്യേക കരുതലും ജാഗ്രതയും പാലിക്കേണ്ടതാണ്.

                       English Summary
   
                           The India Meteorological Department has forecast widespread rain in Kerala today, with yellow alerts issued for Idukki, Ernakulam, Thrissur, Palakkad, Malappuram, Kozhikode and Wayanad. Isolated heavy rainfall is expected. Yellow alerts have also been announced for Pathanamthitta, Kottayam, Idukki and Ernakulam on October 9.